MANILA, Philippines — Itinanggi ng Department of Foreign Affairs (DFA) na “nag-aabogado” ito para kay dating Ako Bicol Rep. Zaldy Co matapos silang akusahan ni Navotas City Rep. Toby Tiangco ng pagkiling dahil sa hindi pagkansela ng pasaporte ng dating mambabatas.
Ayon sa DFA, malinaw sa Republic Act No. 11983 o New Philippine Passport Act na maaari lamang kanselahin o bawiin ang isang pasaporte sa mga partikular na kaso, kabilang na kung may court order laban sa isang convicted o fugitive from justice.
“This process is governed by established legal criteria and is not subject to arbitrary or political considerations,” pahayag ng DFA.
“Our respect for the constitutional guarantee of due process and the rule of law cannot be rewritten on a whim—the government cannot simply play ‘gotcha’ with passports,” dagdag pa nito.
Giit naman ni Tiangco, maaari pa ring gamitin ng DFA ang Section 4 ng batas ukol sa national security para bawiin ang pasaporte ni Co.
“Isn’t that a national security issue? Isn’t that situation fall under it?” ani Tiangco, sabay banggit na tumataas ang galit ng publiko na maaaring magdulot ng “destabilization” sa gobyerno.
Bumuwelta ang DFA at sinabing mali ang pagkaunawa ni Tiangco sa batas.
“His accusation reflects a misunderstanding of the legal standards governing passport cancellation,” pahayag ng DFA.
“If Congressman Tiangco has genuine concerns and substantive evidence, he should seek judicial relief rather than indulge in baseless accusations.”
Ayon sa DFA, ang pagsunod sa batas at due process ang dapat manatiling gabay ng mga lingkod-bayan. RNT/JGC
