MANILA, Philippines – Iginiit ng Land Transportation Office (LTO) nitong Biyernes na may legal na basehan sila para hulihin at i-impound ang light electric vehicles (LEVs) gaya ng e-bikes at e-trikes na naglalakbay sa national highways.
Ayon kay LTO Chief Assistant Secretary Markus Lacanilao, ang implementing rules and regulations (IRR) ng Electric Vehicle Industry Development Act (EVIDA) Law ang nagbibigay daan para ipatupad ang bagong polisiya, na naglilimita sa operasyon ng e-bikes at e-trikes sa mga pangunahing kalsada ng bansa.
“Hindi tama ang ulat na walang legal na basehan ang pagbabawal sa operasyon ng e-bikes at e-trikes simula December 1,” ani Lacanilao.
Aniya, malinaw sa EVIDA IRR na ang LEVs na may bigat na 50 kilograms at para sa exclusive private use lamang ay hindi nakalaan para sa public highways, o mga kalsadang hindi pagmamay-ari ng gobyerno.
Noong Huwebes, sinabi ng LTO na sisimulan nila ang nationwide apprehension at impounding ng e-bikes at e-trikes sa national highways simula Lunes, December 1, 2025.
Ang mga sasakyan sa secondary roads ay bibigyan muna ng babala, habang ang local government units (LGUs) ay magkakaroon ng limang araw upang ipaalam ang bagong polisiya sa kanilang nasasakupan.
“‘Yung sa December 1, kapag sila ay tumakbo sa national highway, huhulihin namin sila, i-impound namin sila. Pero ‘yung sa secondary road, bibigyan sila ng babala na bawal na. Hindi pa sila mai-impound,” ani Lacanilao.
Sinabi rin ng LTO na ang EVIDA Law ay nagbibigay ng probisyon para sa registration ng lahat ng electric vehicles, maliban sa mga intended for private use.
Ayon kay Lacanilao, handa ang ahensya na irehistro ang e-bikes at e-trikes sa ilalim ng dating Administrative Order (AO) na naglalatag ng proseso ng registration. Ilalabas ang AO sa loob ng linggo.
“Binilisan namin ang hulihan kaya bibilisan din namin ito. Ipapangako ko, by December, okay na ito,” dagdag niya.
Samantala, sa isang post sa X (dating Twitter), binatikos ni Bicol Saro party-list Representative Teddy Ridon ang polisiya ng LTO, sinasabing walang legal na basehan ang implementasyon nito.
Aniya, pinapayagan ng EVIDA Law ang LEVs na gumamit ng lahat ng pangunahing lokal at national roads. Dagdag pa niya, hindi puwedeng gamitin ang DOTC–LTO Memorandum Circular 89-105 para i-impound ang unregistered e-bikes at e-trikes, dahil malinaw sa EVIDA Law na ang EVs na para sa exclusive private use ay hindi kailangang irehistro sa DOTr at LTO.
“Hinihikayat namin ang DOTr, LTO, at MMDA na itigil ang anumang plano o polisiya na mag-impound ng LEVs, lalo na ang private-use LEVs, at repasuhin ang kanilang mga patakaran para siguraduhing sumusunod sa EVIDA Law. Pananagutin namin ang mga ahensiya sa anumang labis na aksyon laban sa private-use LEV users,” ani Ridon. RNT/MND
