MANILA, Philippines – Itinanggi ng National Bureau of Investigation (NBI) nitong Lunes, Nobyembre 17 ang mga alegasyon na ang aide ng dating mambabatas na si Zaldy Co ay labag sa batas na ikinulong, binugbog, at pinalipad patungong Chile upang pigilan siyang tumestigo sa mga maanomalyang proyekto sa flood control.
Sa isang pahayag, sinabi ng NBI na naglabas ito ng pahayag upang “linawin at itama ang mga mapanlinlang na alegasyon ni dating Congressman Mike Defensor” tungkol sa aide ni Co na si John Paul Estrada, at sa kanyang asawa.
Sa isang panayam, sinabi ni Defensor na ang mag-asawa ay binugbog ng mga tauhan ng NBI at pinalipad patungong Chile na may mga pekeng pasaporte.
Samantala, nanawagan ang ahensya kay Defensor na magharap ng ebidensya.
Ayon pa sa ahensya, nagbigay ng katiyakan si Defensor na magsusumite siya ng ebidensya hinggil sa kanyang mga pahayag.
Sinabi nito na sakaling matibay ang ebidensya, magpapatuloy ang NBI sa naaangkop na mga aksyon sa imbestigasyon.
Ayon sa NBI, nakikipag-ugnayan na ito sa Bureau of Immigration hinggil sa usapin.
Kinondena din ng NBI ang “false, malicious, o unverified statements na naglalayong pahinain ang kredibilidad at integridad” ng kagawaran. Jocelyn Tabangcura-Domenden
