MANILA, Philippines – Pinalalakas ng Department of Agriculture (Department of Agriculture (Philippines)) ang mga paghahanda nito laban sa posibleng malakas na El Niño, kasabay ng babala sa maaaring pagbaba ng ani at pagkasira ng suplay ng pagkain sa bansa.
Ayon kay Agriculture Secretary Francisco Tiu Laurel Jr., kabilang sa mga hakbang ang pagpapalawak ng pagtatanim ng mga pananim na matibay sa tagtuyot tulad ng munggo, pagpapalawak ng irigasyon, at pagbibigay ng climate-resilient seeds at fertilizer assistance.
“What we learned during the 2024 El Niño will guide how we prepare and intervene this time around,” ani Tiu Laurel.
Kasunod ito ng pag-raise ng El Niño alert ng state weather bureau PAGASA noong nakaraang buwan, matapos nitong iulat ang 79% posibilidad na mabuo ang penomenon mula Hunyo hanggang Agosto.
Ayon sa DA, isinasagawa rin ang irrigation system assessments, climate risk mapping, localized planning, at prepositioning ng drought-tolerant seeds.
Ipinahayag din ng ahensya na bukas ito sa pag-import ng hanggang 1.5 milyong metriko tonelada ng bigas mula Vietnam sa presyong kompetitibo, alinsunod sa umiiral na kasunduan.
“Just like last year, when President Ferdinand Marcos Jr. imposed an import ban from September to December to support palay prices, we will continue to balance food security with the interests of our farmers, ensuring they earn a fair return for their hard work,” ani Tiu Laurel.
Binanggit din ang mga programa sa ilalim ng National Rice Program (NRP) at Rice Competitiveness Enhancement Fund (RCEF) para sa mekanisasyon, irigasyon, at water-saving technologies.
Samantala, ayon sa datos ng Philippine Statistics Authority, bumaba ng 2.4% sa P243.62 bilyon ang crop production sa unang quarter ng taon, na bumubuo ng halos 56% ng kabuuang produksyon sa agrikultura.
Naitala rin ang 6.26% na pagbaba sa produksyon ng palay sa 4.4 milyong metriko tonelada dulot ng mga weather disturbance noong huling bahagi ng 2025 at pinsala sa mga irrigation system. Santi Celario
