MANILA, Philippines- Aapela ang Bangsamoro Autonomous Region in Muslim Mindanao (BARMM) sa desisyon ng Supreme Court na ihiwalay ang lalawigan ng Sulu mula sa governing body.
Sa Saturday News Forum sa Quezon City, sinabi ni BARMM spokesperson and Cabinet Secretary Mohd Asnin Pendatun, “Magfa-file kami… a motion for leave to intervene with motion for partial reconsideration.”
Nitong buwan, pinagtibay ng Supreme Court ang validity ng Bangsamoro Organic Law, subalit, idineklara nito ang Sulu na hindi parte ng BARMM.
Sinabi ni Pendatun na natanggap ng BARMM government ang kopya ng desisyon ng korte noong Setyembre 16.
“So we have until Oct. 1 to find or to make use of that legal remedy,” wika ng opisyal.
“Pero since kami nga ang pinakaapektado… we will still explore the option to file a motion for leave to intervene with a motion for partial reconsideration,” dagdag niya.
Nilalayon ng Bangsamoro Organic Law (BOL), isinabatas noong Hulyo 27, 2018, na palitan ang Autonomous Region in Muslim Mindanao (ARMM) ng BARMM, na magkakaroon ng expanded land at water jurisdiction, fiscal autonomy, at increased share sa national government resources.
Noong 2018, kinuwestiyon ni Sulu Governor Abdusakur Tan II sa SC ang legalidad ng BOL, kung saan iginiit na hindi maaaring buwagin ang ARMM nang hindi inaamyendahan ang Konstitusyon.
Samantala, tinabla ng Sulu province ang ratipikasyon ng BOL sa plebisito noong 2019.
“As Sulu rejected the Bangsamoro Organic Law in the plebiscite, it was wrong to include the province in BARMM,” giit ni SC spokesperson Camille Ting.
Nakatakdang isagawa ng BARMM ang una nitong parliamentary elections sa Mayo 2025. Subalit, sa pinakabagong desisyon, hindi makalalahok ang Sulu sa eleksyon.
“They are not part of the BARMM, so they won’t be participating in that,” ani Ting.
“Sulu is very important in the BARMM. We cannot speak about the Bangsamoro identity, the Bangsamoro struggle or the Bangsamoro narrative without starting in Sulu. So, ganoon ho kaimportante at kaya ho ganoon ho kabigat on our part iyon pong pagkawala ng Sulu,” ayon naman kay Pendatun. RNT/SA
