ILOILO CITY – Pinasigla ni boxing icon at senatorial candidate Manny Pacquiao ang mga tao sa ikalawang campaign rally ng Alyansa Para sa Bagong Pilipinas, na naghatid ng taos-pusong talumpati tungkol sa kanyang mga personal na pakikibaka, kanyang pananaw para sa bansa, at kanyang pangako sa pagtulong sa mga Pilipino na makabangon mula sa kahirapan.
Sinimulan ni Pacquiao ang kanyang talumpati nang isang pasasalamat dahil sa mainit na pagtanggap at pagkakataong makausap ang mga taga-Iloilo.
Ibinahagi ng dating senador ang kanyang sariling paglalakbay mula sa matinding kahirapan hanggang sa tagumpay, at inalala ang hirap ng pagtulog sa mga lansangan na gamit ay karton na banig at nakakaranas ng mga araw na walang pagkain.
“Bago po ako naging Manny Pacquiao, dumaan po ako sa pinakamahirap na sitwasyon ng pamilya,”ani Pacquiao kung saan binibigyang-diin nito ang kanyang malalim na pag-unawa sa kahirapan.
Idiniin ng dating senador at eight-division world champion ang kanyang adbokasiya para sa pagbibigay ng abot-kayang pabahay, sustainable livelihoods, at libreng edukasyon para sa mga mahihirap na Pilipino.
Plano din ni Pacquiao na itulak ang pagtaas ng pondo para sa mga small and medium enterprises (SMEs), na nakikita niya bilang isang pangunahing driver ng paglikha ng trabaho.
“God willing, kung ako ay makabalik sa Senado, sisiguraduhin ko na magkaroon ng pondo para sa sustainable livelihood programs upang mapalakas natin ang SMEs at makapagbigay ng trabaho sa milyun-milyong Pilipino,” ani Pacquiao.
Nais din ni Pacquiao na mag-iwan ng pangmatagalang legasiya, hindi lamang sa palakasan kundi sa pag-angat ng buhay ng mga Pilipino, na nakakuha ng inspirasyon mula sa pagbabago ng Singapore sa ilalim ni Lee Kuan Yew.
“Kapag sinabi mong Singapore, naaalala natin si Lee Kuan Yew dahil nag-iwan siya ng legasiya na nakatulong sa mga susunod na henerasyon. ‘Yan din ang gusto kong gawin para sa ating bansa,” ayon pa kay Pacquiao.
Tinapos ni Pacquiao ang kanyang talumpati sa panawagan para sa pagkakaisa, kung saan hinimok nito ang kapwa Pilipino—lalo na ang mga nasa posisyon ng impluwensya—na magtulungan sa pagbibigay ng mga tahanan, kabuhayan, at edukasyon para sa mga mahihirap.
“Hindi tayo forever dito. Lilipas lang din tayong lahat, kaya sana magkaisa tayo para umunlad ang bawat Pilipino,” ani Pacquiao.
Sa kanyang mensahe ng pag-asa at pagkilos, pinalakas ni Pacquiao ang kanyang pangako sa pagbuo ng isang magandang kinabukasan para sa mga Pilipino, at nilinaw na ang kanyang laban ay malayo pa sa pagtatapos—sa pagkakataong ito sa kanyang pagbabalik sa senado.
Samantala, kasalukuyang nasa Davao ang dating senador na si Manny Pacquiao upang magsagawa ng campaign rally kasama ang line-up ng Alyansa Para sa Bagong Pilipinas. RN
