Pagkakaloob ng ‘nomad visas’ sa pagpapalakas ng PH tourism suportado ni PBBM

MANILA, Philippines- Ipinag-utos ni Pangulong Ferdinand Marcos Jr. ang masusing pag-aaral para sa posibleng pagkakaloob ng “nomad” visas para makahikayat ng long-stay tourists sa Pilipinas at makatulong namapalakas ang sektor ng turismo.

Ang pahayag na ito ng Pangulo ay matapos na makipagpulong sa Private Sector Advisory Council for Tourism (PSAC-Tourism) sa Palasyo ng Malakanyang, araw ng Miyerkules, Hulyo 3.

Sa nasabing pagpupulong, tinukoy ni PSAC-Tourism member LT Group president at CEO Lucio Tan III ang pangangailangan para sa Pilipinas na sumunod sa Southeast Asian neighbors at magpalabas ng nomad visas o kahalintulad na remote work visas para makahikayat ng long-term foreign visitors, partikular na ang freelancers.

Pinapayagan ng Nomad visas ang mga indibidwal na tumira at magtrabaho sa labas ng kanilang ‘home country’ habang nagtatrabaho doon.

“We need to issue nomad visas quickly to attract long-stay tourists. Other countries like Thailand, Malaysia, and Indonesia are already benefiting from this approach,” ayon kay Tan.

Inirekomenda ng PSAC-Tourism na magpalabas si Pangulong Marcos ng isang Executive Order (EO) para agad na ipatupad ang nomad visas nang walang tax incentives, na maaari namang idagdag sa oras na maipasa na ang batas.

Bilang tugon, nagpahayag naman ng kanyang pagsuporta si Pangulong Marcos sa naturang interim solution at inatasan ang Office of the Executive Secretary na agad na magbalangkas ng EO at pumili ng pilot country para sa inisyatiba.

Ang ilan sa Asian countries na nagkakaloob na ng digital nomad visas o kahalintulad na remote work visas para sa kwalipikadong Filipino ay ang:

• Malaysia (tatlo hanggang 12 buwan, renewable para sa karagdagang taon)

• South Korea (isang taon)

• Taiwan (pinapayagan naman sa Gold Card ang digital nomads na pumasok at lumabas ng Taiwan para sa isa hanggang tatlong taon)

• Thailand (limang taon na may 180-day stay period)

• United Arab Emirates (isang taon)

Samantala, tinukoy ni Pangulong Marcos ang papel ng pribadong sektor para palakasin ang sektor ng turismo ng Pilipinas lalo na sa pamamagitan ng pagpapabilis ng industry-specific training programs ng mga indibidwal na may kasanayan para sa agarang trabaho sa tourism-related jobs.

Sa naturang pulong pa rin, tinukoy ni Filinvest Development Corporation President at CEO Joji Gotianun Yap ang pangangailangan na magtatag ng malaking bilang ng tourism workers na may Technical Education And Skills Development Authority (TESDA) certifications.

“Eighty percent of our tourism workforce holds TESDA certifications. We should build on this by further increasing these certifications, with the private sector identifying the specific skills required,” ani Yap.

Para kay Pangulong Marcos, binigyang-diin nito ang papel ng industriya sa paghubog sa mga pagsisikap sa pagsasanay.

“The private sector should guide us on the exact skills needed,” ang sinabi pa rin ni Yap.

Idinetalye ni Chairman Popoy de Vera ng Commission on Higher Education (CHED) ang strategic approach sa turismo at hospitality education.

“We have numerous institutions offering four-year degrees in Tourism and Hospitality Management. By allowing top schools to run these programs, we ensure quality and meet current needs,” ayon kay de Vera.

“TESDA certifications can now be credited towards these degrees, providing students with a flexible pathway,” patuloy ng opisyal.

Sa kabilang dako, iginiit ni Pangulong Marcos ang kahalagahan ng short-term courses, sabay sabing mabibigyang-daan nito na mabigyan agad ng trabaho ang mga indibidwal.

“Well-trained individuals are rapidly employed,” aniya.

Samantala, kumpiyansa ang PSAC-Tourism na ang mga nabanggit na inisyatiba ang magpoposisyon sa Pilipinas bilang “prime destination for tourists, enhance the quality of its tourism workforce, at drive economic growth.” Kris Jose