MANILA, Philippines – Sinabi ni Paolo Ortega V, Deputy Speaker ng House of Representatives of the Philippines, na ang kahilingan ni Chel Diokno na ilagay sa kustodiya ng House justice panel si Ramil Madriaga ay naaayon sa tungkulin ng Kamara na magsagawa ng patas na imbestigasyon sa mga impeachment complaint laban kay Sara Duterte.
Nauna nang hiniling ni Diokno kay Gerville Luistro, chairperson ng House Committee on Justice, na ilagay sa kustodiya ng komite si Madriaga dahil maaari itong maging “material witness” sa impeachment case.
Sa kasalukuyan, nakakulong si Madriaga sa Camp Bagong Diwa sa Taguig City.
Sinabi ni Ortega na sinusuportahan niya ang kahilingan ni Diokno dahil isa siya sa mga nag-endorso ng ikaapat na impeachment complaint laban kay Duterte.
Ang reklamo ay inihain ng abogado na si Nathaniel Cabrera at inendorso nina Ortega at Bienvenido Abante, kinatawan ng Manila. Ayon sa justice panel, sapat ang laman o “sufficient in substance” ng nasabing reklamo.
“The objective is straightforward: to preserve documentary evidence and ensure the safety and availability of a potential witness amid the serious allegations being examined,” sinabi ni Ortega sa isang pahayag.
Ayon kay Diokno, maaaring maging mahalagang saksi si Madriaga dahil humiling na ito sa Office of the Ombudsman of the Philippines na imbestigahan si Duterte sa umano’y mga transaksiyong may kinalaman sa korapsyon. Inangkin ni Madriaga na naghatid siya ng malalaking halaga ng pera sa iba’t ibang tao sa utos umano ni Duterte.
Itinanggi ni Duterte ang paratang at nagsampa ng kasong perjury laban kay Madriaga.
“Such action is consistent with the House’s constitutional duty to conduct a fair, orderly, and evidence-based inquiry,” ayon kay Ortega.
Dagdag pa niya, hindi maaaring iwasan ng Kamara ang impeachment process dahil tungkulin nito sa Konstitusyon na tiyakin ang pananagutan sa pamahalaan, itaguyod ang rule of law, at protektahan ang interes ng publiko.
Iginiit din ni Ortega na ang impeachment complaint ay hindi bunga ng personal na galit o maniobrang pulitikal kundi nakabatay sa mga sinumpaang salaysay, impormasyon mula sa pagdinig ng komite, at mga dokumentadong alegasyon. RNT/MND
