MANILA, Philippines – Pinangunahan ni Manila Vice Mayor Chi Atienza ang mabilis na pag-apruba sa pagpapalabas ng calamity funds para sa mga pamilyang nawalan ng tirahan dahil sa sunog kamakailan sa lungsod noong Huwebes, Hulyo 3.
Agad na ipinasa sa unang pagbasa ang mga resolusyon para ilagay sa state of calamity ang Barangay 439 at 448 na nagbigay-daan sa agarang pagpapalabas ng calamity fund ng mga barangay, na ilalaan para sa direktang tulong pinansyal sa mga residenteng nawalan ng tirahan.
“Under my leadership, together with the entire council, we passed these resolutions to provide immediate support to the fire-affected barangays,” ani Atienza.
Ang aksyon na ito ay kasunod ng pagbisita sa lugar ng Bise Alkalde sa mga residenteng naapektuhan ng sunog noong Hulyo 2. Personal niyang tinasa ang sitwasyon, nakipag-usap sa mga biktima, at pagkatapos ay nagpatuloy na maghain kaagad ng mga kinakailangang resolusyon upang matiyak na ang suporta ng gobyerno ay maibibigay nang walang pagkaantala.
Sa pagtataguyod ng mga pangunahing prinsipyo ng ‘Bilis Kilos’, agad na umaksyon sina Mayor Isko Moreno Domagoso at Vice Mayor Chi Atienza upang matugunan ang mga insidente ng sunog at matiyak na ang mga apektadong pamilya ay makakatanggap ng agarang tulong mula sa pamahalaang lungsod. JAY Reyes
