MANILA, Philippines – Nagpulong ang Land Transportation Franchising and Regulatory Board (LTFRB) sa mga operator ng bus at PUV terminal sa loob ng mga mall para pag-usapan ang pagpapabuti ng pasilidad at paghikayat sa mas maraming Pilipino na gumamit ng pampublikong transportasyon.
Ayon kay Chairperson Vigor D. Mendoza II, bahagi ito ng plano para sa mabilis at komportableng biyahe ng milyon-milyong Pilipino, alinsunod sa utos ni Pangulong Ferdinand Marcos Jr..
“Gusto nating pagandahin ang commuter experience ng ating mga mananakay para hindi na magdala ng kotse and for them to ride the public transportation instead,” sabi ni Mendoza.
Kasabay nito, mahigpit na iniinspeksyon ng LTFRB ang mga terminal sa buong bansa. Umabot na sa 116 operator ang nakatanggap ng show cause orders at notice of violation. Kamakailan, dalawang operator sa mall terminals ang sinummon dahil sa kakulangan sa pasilidad para sa mga pasahero, lalo na sa senior citizens at PWDs.
Ayon kay Mendoza, nagiging mahalagang bahagi ng public transport ang mga mall dahil dito matatagpuan ang ilang train stations, bus, at PUV terminals. “We need to improve the facilities because we can never encourage people to commute if terminals would make them uncomfortable. In the case of malls, motorists can leave their cars in mall parking areas and commute instead.”
Nagbahagi ng suhestiyon at nangakong susunod sa LTFRB rules ang ilang operator ng mall terminals. Optimistiko si Mendoza na ang mga tinalakay ay magiging realidad at makakatulong sa kapakanan ng mga commuters. DANNY QUERUBIN
