MANILA, Philippines – Inihayag ng Alliance of Concerned Teachers (ACT) Philippines ang panawagan sa Department of Education (DepEd) at Department of Budget and Management (DBM) na tiyakin ang buong pagpapalabas ng P20,000 service recognition incentive (SRI) para sa mga guro at education workers bago mag-New Year.
Ayon kay ACT Chairperson Ruby Bernardo, nararapat na mapabilis ng DepEd at DBM ang pagpapatupad ng malinaw na patakaran sa pagbibigay ng SRI, lalo’t ang mga guro at empleyado ng edukasyon ay matagal nang nakararanas ng stagnant na sahod, tumataas na presyo ng pangunahing bilihin, at mas mataas na workload.
“Ang pagtaas ng sahod ay nabawasan na, ang inaasahang benepisyo ay nasuspinde o nahati. Kung tunay na pinapahalagahan ng gobyerno ang mga guro at empleyado, ang sahod at benepisyo ay dapat makatao at disenteng halaga,” sabi ni Bernardo.
Binanggit niya na ang DepEd ay dapat agad na isaayos ang internal processes upang matiyak ang pantay na implementasyon sa lahat ng rehiyon at dibisyon, habang ang DBM ay kinakailangang mabilis na maglabas ng budgetary guidelines at approvals upang maiwasan ang pagkaantala o partial release ng SRI.
Aniya, “Hindi makatarungan na tawaging pagkilala ang serbisyo ng guro kung hindi naibibigay ng tama at buo ang malinaw na nakatalagang benepisyo. Anumang release na kulang sa P20,000 o lampas sa Bagong Taon ay sumisira sa layunin ng SRI.”
Idinagdag ni Bernardo na ang patuloy na pagkaantala o pagbawas ng SRI ay lalong magdudulot ng frustrasyon at demoralization sa mga guro at education workers, na kasalukuyang humahawak sa mababa at labis na pinipiling public education system.
Ayon sa Administrative Order No. 40 na nilagdaan ni Pangulong Ferdinand Marcos Jr. noong Disyembre 11, inaprubahan ang one-time SRI na hanggang P20,000 para sa mga kwalipikadong empleyado ng Executive branch, kabilang ang DepEd personnel.
Bago ito, sinabi ng DepEd na ang SRI ay ipapalabas nang paunti-unti, kung saan ang unang tranche ay nasa pagitan ng P10,000 hanggang P14,500 bawat kwalipikadong empleyado, at ang natitirang halaga ay ipapamahagi kapag naaprubahan ang request para sa modification of allotments. RNT/MND
