COTABATO CITY, Philippines – Humiling ang central committee ng Moro Islamic Liberation Front (MILF) kay Pangulong Ferdinand Marcos Jr. na itama ang mga appointments sa Bangsamoro Transition Authority (BTA), na ayon sa grupo ay nagpapahina sa kanilang “institutional leadership” at sumisira sa pinagkasunduang transition framework ng peace process.
Isa sa pinagtatalunang appointments ay si kasalukuyang interim Chief Minister ng Bangsamoro na si Abdulraof Macacua, na inappoint noong Marso ng nakaraang taon upang palitan si Ahod Ebrahim, na inendorso ng MILF central committee sa nasabing posisyon.
Bukod kay Macacua, kinuwestiyon din ng MILF ang appointment ng anim na non-MILF members sa BTA nang walang konsultasyon sa central committee, alinsunod sa probisyon ng Comprehensive Agreement on the Bangsamoro (CAB) at Bangsamoro Organic Law (BOL).
Ayon sa manifesto ng MILF na inilabas sa Maguindanao del Norte provincial assembly sa Cotabato State University noong Pebrero 14, naglabas sila ng pagkabahala sa pagpapalit kay Ebrahim at pag-appoint kay Macacua bilang interim chief minister.
Nilinaw ng MILF na sa 41 slots na nakalaan sa grupo sa 80-member BTA, inappoint lamang ng Pangulo ang 35 endorsed nominees ng dating rebel group at pinuno ng ilang non-MILF members, na labag sa probisyon ng CAB.
“We call upon the national leadership to uphold the letter and spirit of the peace agreement, the CAB and BOL,” aniya sa manifesto, at nanawagan ng agarang pagsasaayos ng BTA appointments upang igalang ang lehitimong pamumuno ng MILF.
Inilahad ng central committee na ang pag-appoint ng hindi inendorso ng MILF, kabilang si Macacua, ay “panghihimasok sa internal affairs ng MILF” at nagbabanta sa katatagan ng rehiyon.
Habang ginaganap ang assembly ng MILF sa Cotabato City, si Macacua ay nasa Talayan, Maguindanao del Sur para sa “Istiqbal Ramadhan Kareem 2026” kung saan sinabi niyang aalisin ang ilang BARMM officials na umano’y kumakalat ng maling impormasyon laban sa kanya, ngunit hindi muna kikilos dahil sa paparating na Ramadan.
“Kung hindi ako aalis bilang interim chief minister pagkatapos ng Ramadan, aalisin ko ang ilang BARMM officials,” aniya, nang hindi binabanggit ang mga pangalan. RNT/MND
