MANILA, Philippines – Inilunsad ng Meta Platforms ang mga bayad na subscription plan para sa mga pangunahing aplikasyon nito na Facebook, Instagram, at WhatsApp, bilang bahagi ng hakbang na pag-iba-ibahin ang pinagkukunan ng kita ng kumpanya bukod sa advertising.
Inanunsyo ni Meta head of product Naomi Gleit sa isang video sa Instagram ang paglalabas ng Facebook Plus, Instagram Plus, at WhatsApp Plus sa pandaigdigang merkado, at sinabing may nakahandang karagdagang produkto para sa mga negosyo, content creators, at artificial intelligence services.
Ang hakbang ay kasabay ng patuloy na pagsisiyasat ng mga mamumuhunan sa malakihang paggastos ng kumpanya sa artificial intelligence, kung saan tinatayang aabot sa $125 billion hanggang $145 billion ang capital expenditure ngayong taon. Matapos ang anunsyo, tumaas ng halos tatlong porsyento ang halaga ng stock ng Meta.
Ayon sa mga ulat, aabot sa $3.99 kada buwan ang Facebook Plus at Instagram Plus, habang $2.99 kada buwan naman ang WhatsApp Plus.
Magbibigay ang mga subscription ng mas advanced na features tulad ng mas mahusay na analytics, story rewatch statistics, mas malawak na audience reach, at customization options para sa profile. Ang WhatsApp Plus ay tututok sa personalization gaya ng premium stickers, custom ringtones, at app themes.
Ayon sa Meta, plano nitong pagsamahin sa hinaharap ang mga serbisyo nito sa ilalim ng iisang brand na tatawaging Meta One.
Nauna nang naglunsad ang kumpanya ng ad-free paid versions ng Facebook at Instagram sa Europe noong 2023 bilang pagsunod sa data privacy rules ng European Union, kung saan binigyan ang mga user ng pagpipilian sa pagitan ng libreng ad-supported access at bayad na subscription. RNT
