Pamunuan ng MPD, blanko pa sa motibo ng pananambang sa nominee ng ABP Partylist

MANILA, Philippines – Blanko pa ang pamunuan ng Manila Police District (MPD) sa motibo sa pananambang sa 3rd nominee ng Ang Bumbero ng Pilipinas (ABP) Partylist noong Lunes ng gabi.

Sa Meet the Press Weekly forum, sinabi ni Office of the District Director Administrator PCol Roderico Roy Jr, na may sampung araw pa ang kapulisan na magsagawa ng validation para malaman ang motibo at kung ang nangyaring pamamaril ay isang uri ng election-related violence.

Ngunit ayon kay PCol Roy, batay sa kanilang inisyal na imbestigasyon ay sugatan ang isa sa suspek at may koordinasyon na sila hindi lamang sa buong National Capital Region (NCR) kundi sa kalapit na probinsya tulad ng Region 3 at Region 4 na magsagawa rin ng koordinasyon sa mga ospital kung may na-admit na may gunshot wounds upang malaman kung ito ay sangkot sa krimen.

Sinabi naman ni MPD spokesperson Major Philipp Ines, na tuloy-tuloy ang ginagawa nilang imbestigasyon at follow up operation at katunayan aniya ay mayroon silang kumperensya para sa ilang update kaugnay sa insidente.

Pero sinabi ni Major Ines, hindi pa sila maaaring magbigay ng detalyadong mga komento upang hindi makumpromiso ang kanilang ginagawang follow-up.

Aniya, malalaman din agad ng publiko kapag mayroon nang positibong resulta sa kaso.

“Kailangan kasi may ebidensya, detalyado at validated ang ating ibibigay na mga impormasyon para makamit ang totoong hustisya,” sabi ni Major Ines.

Samantala, sinabi ni Major Ines na nagbabase lamang ang MPD sa datos na hawak nila pagdating sa crime rate sa Maynila.

Kung ikukumpara aniya ang datos sa unang kwarter ngayong 2025 kumpara noong nakaraang taon, mayroon aniyang crime solution efficiency sa tinatawag na eight focus crime sa 4.6 %.

Habang sa index crime na bibabantayan ng PNP ay may pagbaba ng 26.32% base pa rin sa datos na galing sa mga stations na inirereport.

Nangangahulugan lamang ayon kay Major Ines na epektibo ang inilatag ng MPD na outpost at pagpapalakas ng presensya ng kanilang kapulisan sa mga lugar sa lungsod. Jocelyn Tabangcura-Domenden