MANILA, Philippines – Nagsimula na ang Panagbenga Festival sa Baguio City nitong Sabado, Pebrero 1.
Sinimulan ito sa pamamagitan ng street dancing at drum and lyre competition para sa 29th Panagbenga Festival o Baguio Flower Festival sa temang Blossoms Beyond Boundaries.
Bago ang event, nagkaroon muna ng interfaith opening prayers ng iba’t ibang religious groups at Cordilleran prayer (Uggayam) ng Baguio Flower Festival Foundation Inc. (BFFFI) chairman for life at dating Mayor Mauricio Domogan sa Panagbenga Park.
Naglaban-laban ang limang elementary street dancing at drum-and-lyre contingents, ito ay ang Apolinario Mabini Elementary School, Manuel Roxas Elementary School, Lucban Elementary School, Tuba Elementary School, at Rosario Integrated Elementary School mula Rosario, La Union.
Guest performer naman ang Pugo Central Elementary School mula sa Pugo, La Union.
Sumali naman sa grand opening parade ang 13 cultural dance groups mula Cordillera.
Ayon kay Evangeline Payno, chief of staff ng Panagbenga Executive Committee, 30 percent ng iskor ng participating contingent ay mula sa kanilang performance sa grand opening parade at drum-and-lyre competition habang ang 70 percent ay manggagaling sa kanilang performance sa grand street dancing parade sa Pebrero 22.
Gaganapin naman ang grand float parade sa kasunod na araw.
Hahasain naman ng mga contingent ang kanilang performance para sa kompetisyon sa Pebrero 15 sa Melvin Jones football ground. RNT/JGC