MANILA, Philippines – Sinabi ng Energy Regulatory Commission (ERC) nitong Miyerkules, Enero 3 na nakikipag-ugnayan na ito sa Department of Energy (DOE) at National Grid Corporation of the Philippines (NGCP) para maibalik ang kuryente sa Panay Island na nakaranas ng malawakang power outage.
Sa pahayag, sinabi ng ERC na ang power outage ay dulot ng ‘unplanned outages’ ng Panay sub-grid noong Martes, Enero 2.
“The ERC understands the inconvenience this situation has caused to the consumers of Panay, and we assure the public that every effort is being made to restore power as quickly as possible,” pahayag ni ERC Chairperson and CEO Monalisa Dimalanta.
Hanggang alas-3 ng hapon ng Miyerkules, sinabi ng regulatory body na nasa 198.1 MW ng kuryente ang nagseserbisyo sa Panay power plants. Sinusuportahan ito ng power sources sa Visayas ng karagdagang 50.9 MW ng kuryente.
Dagdag pa ng ERC, kailangan pa rin ng grid ng tinatayang nasa 300 MW ng kuryente para mapanatili ang suplay, at naghihintay ng karagdagang 135 MW ng kuryente mula sa Palm Concepcion Power Corporation (PCPC).
“To enhance communication and keep consumers better informed during this situation, we have requested the NGCP to increase the frequency of updates provided to the public,” ani Dimalanta.
“Instead of the regular four-hour updates, NGCP has complied and started to provide hourly updates on their Facebook pages. We have also directed NGCP to include information on the status of ongoing restoration efforts,” dagdag pa niya.
Naunang sinabi ng NGCP na ang dahilan ng power interruption ay ang ‘unscheduled maintenance shutdowns’ sa malalaking power plant sa Panay Island.
Maliban sa tripping ng tatlo sa malalaking power generating units at planned maintenance shutdown ng PEDC Unit 3, sinabi ng NGCP na ang maintenance shutdowns at deration ng mga planta sa labas ng approved Grid Operating and Maintenance Program ng Department of Energy (DOE) ay nakadagdag din sa kakulangan ng suplay sa kuryente.
“We emphasize the need for improved planning to ensure sufficient generation per island, with a well-balanced mix of fuels and technology,” dagdag ng NGCP. RNT/JGC
