MANILA, Philippines- Iniutos ng Pasig City RTC ang pag-aresto kay Kingdom of Jesus Christ (KJC) founder Apollo Quiboloy dahil sa kasong qualified human trafficking.
Ito ang ikalawang arrest warrant laban kay Quiboloy matapos mag-isyu ang Davao RTC ng arrest warrant dahil sa mga kasong child abuse.
Ibinasura ni Pasig RTC Branch 159 Acting Presiding Judge Rainelda Estacio-Montesa ang mosyon ni Quiboloy na maipagpaliban o masuspinde ang pagdinig.
Nais din ng kampo ni Quiboloy na ipagpaliban ang pagpapalabas ng warrant of arrest dahil sa nakabinbin nilang motion for reconsideration sa Office of Justice Secretary Jesus Crispin Remulla.
Gayunman, iginiit ng prosekusyon na salig sa Rule 116 ng Rules on Criminal Procedure na pinapayagan lamang na masuspinde ang arraignment kung ang inihain sa DOJ ay
petition for review at hindi motion for reconsideration.
Iginiit ng Korte na sa ilalim ng rules na maaaring isuspinde ang arraignment kung ang akusado ay wala sa tamang pag-iisip, mayroong prejudicial question o may nakabinbing
petition for review sa DOJ o sa Office of the President.
Bukod kay Quiboloy, ipinaaaresto rin ng Pasig RTC Branch 159 sina Jackielyn W. Roy, Cresente Canada, Paulene Canada, Ingrid C. Canada, at Sylvia Cemañes. Teresa Tavares
