MANILA, Philippines – Humingi ng pang-unawa mula sa publiko ang babaeng nag-viral sa social media matapos itong tumayo ng ilang minuto sa isang parking slot ng sementeryo para i-reserve umano ito para sa sasakyan ng kanyang mga kasama na kinabibilangan ng kanyang matatandang magulang at isang bata.
Sinabi ng babae na pinagsisihan daw niya ang ginawa niya para sa parking slot.
“Sa lahat ng nagrere-upload ng video please, stop na po kase ang akin lang po okay na both sides, nagsisi naman po ako,” aniya pa.
Sa viral na video makikita ang babaeng naka-pink na pang-itaas na nakikipag-usap sa telepono habang sinisigawan ng isa pang babae na gustong umalis siya sa espasyo para makaparada ang sarili niyang mga kasama sa isang SUV.
Nangyari ang insidente sa isang sementeryo sa Las Piñas noong gabi ng All Saints’ Day, Nobyembre 1.
Sinabi ng babae na una niyang ipinaglaban ang kanyang ginawa ngunit kalaunan ay napagtanto na mali ang tumayo sa puwang ng paradahan upang magreserba ng espasyo.
Umalis lang ang babae sa kanyang kinatatayuan matapos na itulak palayo ng isa pang babae. RNT
