MANILA, Philippines – Hinamon ni Taumbayan Ayaw sa Magnanakaw at Abusado Network Alliance (TAMA NA) convenor, Prof. David San Juan sina Pangulong Ferdinand Marcos Jr., at Bise Presidente Sara Duterte na sumagot sa mga ulat na nakatanggap sila ng campaign donations mula sa mga kontratista noong eleksyon.
Sa isang press briefing, itinanong ni San Juan kung bakit si Sen. Francis “Chiz” Escudero lamang ang nagpaliwanag sa Commission on Elections ng P30-M na donasyon na nakita sa kanyang campaign fund, ngunit hindi pa nagbibigay ng pahayag ang pangulo at ang bise presidente sa usapin.
“Sen. Chiz Escudero has already explained his campaign donations from contractors, but there are two people who have yet to explain: our president, BBM, and Vice President Sara Duterte – both of them received campaign donations from contractors, according to a report by the Philippine Center for Investigative Journalism (PCIJ),” saad ni San Juan.
“Mr. President BBM, and Madam Vice President Sara Duterte, should also explain. Is the PCIJ report true that you received campaign donations from contractors? And if it is true, is that appropriate?” dagdag niya.
Ipinakita rin ng propesor na kung totoo at labag sa batas ang campaign donations, dapat managot sina Marcos Jr. at Duterte.
Noong kalagitnaan ng Setyembre 2025, naglabas ang PCIJ ng ulat na nagsasabing ang presidente at bise presidente ay nakatanggap ng “tens of millions of pesos in campaign contributions from public works contractors.”
Sa ilalim ng Omnibus Election Code, ang mga kandidato ay ipinagbabawal na kumuha ng mga kontribusyon “for purposes of partisan political activity … directly or indirectly” mula sa mga nakikipagnegosyo sa gobyerno.
Binanggit ng PCIJ na si Radulfo Hilot Jr., may-ari ng Rudhil Construction and Enterprises Inc. sa Zamboanga, ay nag-ambag ng P20 milyon sa kampanya ni Marcos Jr. noong 2022, habang si Jonathan Quirante, may-ari ng Quirante Construction Corporation sa Cebu ay nagbigay ng P1 milyon.
Ayon sa PCIJ, nakinabang umano ang dalawang kontratista sa “steep increase in the value of government contracts awarded to their firms,” gaya noong umabot sa P3 bilyon ang kontrata ng Quirante Construction noong 2023, at noong umabot sa P3.5 bilyon ang kontrata ni Rudhil noong 2024.
Samantala, si Duterte ay napaulat na benepisyaryo ni Glenn Escandor, may-ari ng Genesis 88 na ang kumpanya ay ginawaran ng ilang kontrata sa public works noong administrasyon ng ama ng bise presidente.
Si Escandor, sa pamamagitan ng kanyang realty company, ay nagbayad ng P19.9 milyong campaign advertisement para kay Duterte noong 2022, iniulat ng PCIJ.
Bilang tugon, sinabi ni Palace Press Officer Claire Castro noong huling bahagi ng Setyembre na si Marcos ay “willing to be investigated” at tinawag ng Independent Commission for Infrastructure. RNT/MND
