MANILA, Philippines- Inimbestiigahan ng gobyerno ang posibilidad na mga dayuhan ang sangkot sa viral deepfake video ni Pangulong Ferdinand Marcos Jr. na nag-uutos ng military action laban sa isa pang bansa, ayon sa Palasyo nitong Huwebes.
Bagama’t hindi binanggit ng Presidential Communications Office (PCO) ang partikular na video, ipinost ng nabura nang YouTube channel Dapat Balita ang video kung saan ginaya ang boses ni Marcos na nag-uutos na atakihin ang China.
Ayon kay PCO Assistant Secretary Wheng Hidalgo, sinisikap ng government agencies na tukuyin ang mga indibidwal o grupong responsable sa video.
“Ngayon nakikipag-ugnayan na ang PCO sa DICT(Department of Information Technology) at saka sa NSC (National Security Council) para doon sa imbestigasyon at nag-coordinate na rin sa Facebook, sa Google, sa lahat ng mga social media platforms, para matukoy kung sino ba ang gumawa nito, kasi baka hindi lang dito sa Pilipinas, baka may foreign intruders na gumawa nito, iyong may hackers na galing pa sa ibang bansa, so iniimbestigahan po iyan ng ating pamahalaan,” pahayag ni Hidalgo sa Bagong Pilipinas Ngayon briefing.
Dagdag ng opisyal, nakaaalarma rin ang timing ng deepfake, na lumitaw sa kasagsagan ng Balikatan exercises.
Inihayag ni Hidalgo na maaaring akalain ng mga hindi pamilyar sa boses ni Marcos na totoo ang deepfake. Hiniling niya sa publiko na maging kritikal sa naririnig nilang balita, at beripikahin ang impormasyon sa PCO website. RNT/SA
