MANILA, Philippines – Lumawak pa ang budget deficit ng pamahalaan na pinakamalaki sa loob ng tatlong buwan, noong Marso.
Sa kabila nito, mas maliit pa rin ito sa naitala sa kaparehong buwan noong nakaraang taon.
Sa datos na inilabas ng Bureau of the Treasury (BTr) nitong Miyerkules, Abril 24, ang budget deficit ay nasa P195.9 billion, 6.82% na mas maliit kumpara sa P210.3 billion noong Marso 2023, ngunit mataas sa budget deficit noong Disyembre 2023.
Ang kita ng pamahalaan sa nasabing buwan ay umabot sa P287.9 bilyon, kung saan ang tax revenues ay nasa P223.9 billion. P145.3 billion ang mula sa Bureau of Internal Revenue (BIR) at P74.9 billion sa Bureau of Customs (BOC).
Nasa P64.1 bilyon naman ang non-tax revenues, katumbas ng 86.94% na pagtaas mula sa P34.3 billion sa nakalipas na taon, kasabay ng pagtaas ng bahagi ng BTr ng 229.89% sa P49.1 billion.
“The significant increase for the month was primarily driven by higher dividend remittances, interest on advances from GOCCs, specifically from the National Irrigation Administration and the NG share from PAGCOR income,” sinabi ng BTr.
Samantala, ang expenditures naman sa nasabing buwan ay tumaas din ng 3.18% sa P483.8 billion, kabilang ang P70.9 bilyong halaga ng interest payments.
“While higher disbursements were recorded in departments/agencies, the growth of spending in March was weighed down by the lower subsidies to government corporations and transfers to local government units,” pagpapatuloy ng BTr.
Binanggit din nito ang mas mababang subsidiya sa mga korporasyon katulad ng Power Sector Assets and Liabilities Management Corp. (PSALM), at paglilipat ng P15-billion Coco Levy Funds sa Coconut Farmers and Industry Fund na inaasahan ngayong Abril, kumpara sa paglalabas noong 2023 na ginawa noong Marso.
Nagdala rin ang pinakabagong datos sa year-to-date budget deficit na P272.6 billion, mas mataas kumpara sa P270.6 billion na naitala sa kaparehong panahon noong 2023.
Sa hiwalay na komentaryo, sinabi ng Rizal Commercial Banking Corp. (RCBC) na ang mas mataas na deficit ay posibleng dahil sa 10.7% growth sa government expenditures kasabay mas mataas na global interest rates na nagpataas sa debt servicing costs.
“For the coming months, further pick up in business and other economic activities would still lead to higher government tax revenue collections amid intensified tax collection efforts, as well as other priority tax/fiscal reform measures.” RNT/JGC
