MANILA, Philippines- Sinabi ng Philippine Embassy sa Washington D.C. nitong Huwebes (Manila time) na wala silang natanggap na ulat ng Pilipinong sangkot sa air mishap malapit sa Reagan National Airport.
“Authorities are currently undertaking search and rescue operations. The White House has confirmed that a military helicopter collided with a commercial jet,” pahayag ng Philippine Embassy.
“So far, the Embassy has not received reports of Filipinos involved in the incident,” dagdag nito.
Ayon sa mga opisyal, sangkot ang American Airlines regional passenger jet sa mid-air collision nitong Miyerkules ng gabi sa isang U.S. Army Black Hawk helicopter.
Sinabi ni Senator Ted Cruz ng Texas sa social media na “we know there are fatalities,” bagama’t hindi niya sinabi kung ilan.
Ayon sa kapulisan, nagsasagawa ang iba’t ibang ahensya ng search and rescue operation sa Potomac River, na nasa paligid ng paliparan.
Inihayag ng airport nitong Miyerkules na itinigil ang lahat ng takeoffs at landings sa pagresponde ng emergency personnel sa aircraft incident.
Sinabi naman ng National Transportation Safety Board na kumakalap ito ng mas maraming impormasyon sa insidente.
Ayon sa Philippine Embassy sa Washington, D.C, mahigpit nitong binabantayan ang aviation incident. RNT/SA