MANILA, Philippines- Itinanghal ang First Philippine Polymer Banknote Series (FPPBS), na inilunsad ng Bangko Sentral ng Pilipinas (BSP) noong Disyembre, bilang “Best New Banknote or Banknote Series” ng non-profit organization International Association of Currency Affairs (IACA).
Binanggit ng IACA ang inobasyon sa “uniqueness” ng security features ng FPPBS, tulad ng dynamic value panel na nagbabago ang visual effect base sa light angle, transparent windows, at shadow threads.
Pinuri rin nito ang “aesthetic appeal” at kabuuang disenyo ng series, na inilarawan nitong “captivating and culturally significant.”
Kabilang sa finalists para sa parangal ang Bank of Jamaica New Series, at ang Saka Style Kazakhstani Banknote Series.
Ang FPPBS ay opisyal na inilunsad noong December 2024, kasunod ng pagpapalabas ng P1,000 polymer banknote noong 2022.
“This recognition affirms our commitment to innovation in currency design, ensuring that our banknotes meet the global standards of security and sustainability,” pahayag ni BSP deputy governor for payments and currency management Mamerto Tangonan.
Kasunod ang paggawad ng parangal sa pagkilala sa P1,000 polymer banknote bilang “Banknote of the Year” para sa taong 2022 ng global non-profit organization na International Banknote Society (IBS). RNT/SA
