MANILA, Philippines – Magde-deploy ng 1,261 na tauhan at boluntaryo para sa taunang Pista ni Jesus Nazareno sa Maynila ngayong Biyernes, Enero 9, ang Philippine Red Cross (PRC) upang tumugon sa mga emerhensiyang may kaugnayan sa medisina sa panahon ng Traslacion.
Sa isang press briefing, sinabi ni PRC chairman Richard Gordon na ang mga tauhan ay itatalaga sa 17 first aid stations at 17 welfare desks malapit sa ruta ng Traslacion, o ang prosesyon ng imahe ni Jesus Nazareno.
Ang PRC ay magde-deploy ng 17 first aiders on wheels, 12 scooters para sa roving, 19 ambulance services on the ground, 20 standby ambulances, dalawang rescue boards, at tatlong rubber boats para sa water rescue.
Isang 50-bed emergency field hospital ang itatayo, kasama ang 60 medical personnel para sa posibleng mass casualty incidents at minor to moderate cases.
Ang ospital ay matatagpuan sa Kartilya ng Katipunan Monument sa tabi ng Manila City Hall.
Walo pang PRC chapters at walo pang PRC branches sa National Capital Region ang magiging handa upang tumulong sa mga emergency cases sa panahon ng taunang prusisyon.
Hinikayat ng PRC ang publiko na isulat ang kanilang personal na detalye at kondisyon sa kalusugan sa isang piraso ng papel kung sakaling magkaroon ng emerhensiya.
Ang mga kalahok sa Traslacion ay maaari ring mag-download ng emergency info card ng PRC.
Para sa isang ligtas at maayos na Traslacion, hinihikayat ang mga deboto na sundin ang mga paalala at direktiba ng Quiapo Church at mga awtoridad.
