MANILA, Philippines – Ayon sa Philippine Atmospheric, Geophysical and Astronomical Services Administration (PAGASA) makakaasa ang mga Pilipino na makaranas ng maikling pahinga mula sa mga bagyo sa darating na linggo.
Sa weather outlook nito para sa Nobyembre 14 hanggang 21, sinabi ng PAGASA na ang Intertropical Convergence Zone (ITCZ), northeast monsoon (amihan), at shear line ang magiging dominanteng weather system na makakaapekto sa bansa sa panahon.
Mula Biyernes hanggang Linggo, Nob. 14 hanggang 16, ang ITCZ ay inaasahang magdadala ng maulap na papawirin na may kalat-kalat na mga pag-ulan at pagkidlat-pagkulog sa Palawan, Visayas, at Mindanao.
Ang ITCZ ay isang weather system na nabuo sa pamamagitan ng convergence ng mga hangin mula sa hilaga at timog hemispheres.
Samantala, ang Amihan ay magdadala ng maulap na papawirin na may mga pag-ulan sa Cagayan Valley at Aurora, at bahagyang maulap hanggang sa kung minsan ay maulap na papawirin na may pulu-pulong mahinang pag-ulan sa Cordillera Administrative Region (CAR) at Ilocos Region.
Ang nalalabing bahagi ng Luzon ay makakaranas ng bahagyang maulap hanggang sa maulap na papawirin na may pulu-pulong mga pag-ulan o localized thunderstorms.
Mula Lunes hanggang Biyernes, Nob. 17 hanggang 21, patuloy na maaapektuhan ng ITCZ ang Palawan, Eastern Visayas, at Mindanao.
Ang Batanes at Babuyan Islands ay magkakaroon ng maulap na papawirin na may mga pag-ulan dahil sa amihan, habang ang natitirang bahagi ng Cagayan Valley, Aurora, Quezon, at Bicol Region ay makakaranas ng maulap na papawirin na may kalat-kalat na mga pag-ulan at pulu-pulong pagkidlat-pagkulog dahil sa shear line.
Ang shear line ay isang weather system na nabuo sa pamamagitan ng banggaan ng malamig na hangin mula sa amihan at mainit na hangin mula sa easterlies.
Ang nalalabing bahagi ng bansa ay magkakaroon ng bahagyang maulap hanggang sa maulap na papawirin na may posibilidad ng pulu-pulong pag-ulan o pagkidlat-pagkulog.
Sinabi ng PAGASA na walang tropical cyclone ang inaasahang papasok o bubuo sa loob ng Philippine Area of Responsibility sa panahon ng outlook. RNT/MND
