CAVITE, Philippines – Iniimbestigahan ng Philippine National Police (PNP) ang pinagmulan ng “fake report” tungkol sa umano’y mass shooting sa De La Salle University-Dasmariñas nitong Huwebes.
Ayon kay PNP chief Police Gen. Jose Melencio Nartatez Jr., aalamin ng imbestigasyon kung sino ang nasa likod ng ulat at kung sinadya itong likhain. Kumalat umano ang report sa social media at group chats.
“Those who deliberately create or spread false information that causes public alarm may face appropriate legal consequences,” ani Nartatez.
“Freedom of expression must be exercised responsibly and should never be used to mislead the public,” dagdag niya.
Inatasan din ni Nartatez ang Dasmariñas City police na panatilihin ang police visibility, paigtingin ang cyber patrols at tukuyin ang mga responsable sa pagpapakalat ng ulat.
Nauna nang sinabi ng Dasmariñas City police na walang factual basis ang umano’y mass shooting report matapos itong imbestigahan.
Binalaan din ng pulisya ang publiko na huwag iugnay ang pekeng ulat sa pagkamatay ng isang 24-anyos na lalaki na natagpuang patay sa loob ng sasakyan sa De La Salle Medical and Health Sciences Institute noong Miyerkules. Magkaibang insidente ang mga ito.
Hinimok ni Nartatez ang publiko na beripikahin muna ang impormasyon bago ito ibahagi sa social media.
“We encourage everyone to verify facts first and help prevent the spread of misinformation,” ani Nartatez. RNT/MDS
