MANILA, Philippines — Naitala ng Philippine Institute of Volcanology and Seismology (PHIVOLCS) ang mahigit 6,500 tonelada kada araw ng volcanic sulfur dioxide (SO₂) emission mula sa Bulkang Mayon nitong Miyerkules, Pebrero 5. Ito ang pinakamataas na naitala sa nakalipas na 15 taon.
Ayon sa PHIVOLCS, umabot sa 6,569 tonelada/araw ang average SO₂ emission, habang tumaas din ang running monthly average ngayong Pebrero sa 5,503 tonelada/araw, mula sa 2,571 tonelada/araw noong Enero 2026.
Bagama’t may pagtaas sa SO₂ emissions, wala pa umanong naitatalang katumbas na paglala sa rockfall, pyroclastic density current (PDC) o “uson,” at iba pang indikasyon ng mas mabilis na pagdaloy ng lava sa bunganga ng bulkan.
Naobserbahan din ng mga volcanologist ang malakas na degassing sa tuktok ng Mayon na may kasamang aseismic ash emission.
Babala ng PHIVOLCS, ang patuloy na pagtaas ng SO₂, kahit panandalian, ay maaaring magpahiwatig ng bagong magma intrusion na posibleng magdulot ng karagdagang aktibidad ng bulkan.
Nanatili pa rin sa Alert Level 3 ang Bulkang Mayon na nasa ika-29 na araw ng tuloy-tuloy na effusive eruption. Ayon sa ahensya, muling tumaas ang posibilidad ng lava fountaining o katamtamang pagsabog.
Mahigpit na pinayuhan ang publiko na iwasan ang anim na kilometrong Permanent Danger Zone (PDZ) at maging handa sa posibleng preemptive evacuation ang mga residente sa loob ng walong kilometrong radius, sakaling itaas sa Alert Level 4 ang bulkan.
Nagbabala rin ang PHIVOLCS sa posibleng lahar at sediment-laden streamflow lalo na kung magpapatuloy ang malalakas na ulan dulot ng Bagyong Basyang, at pinayuhan ang civil aviation authorities na iwasan ang paglipad malapit sa tuktok ng bulkan dahil sa panganib ng biglaang ash emission. RNT/JGC
