MANILA, Philippines – Nagbabala ang MUFG Global Markets Research na maaaring humina ang halaga ng piso at lumampas sa ₱64 kada dolyar kung muling tataas ang presyo ng langis dahil sa lumalalang tensyon sa Middle East.
Ayon sa bangko, inaasahan pa rin nilang unti-unting lalakas ang piso patungo sa ₱61 kada dolyar kung bababa ang mga panganib sa pandaigdigang sitwasyon at hihina ang US dollar.
Gayunman, sinabi nilang maaaring humina ang piso sa pagitan ng ₱62 hanggang ₱64.50 kada dolyar kung lalala ang sigalot na may kinalaman sa Iran at muling sisipa ang presyo ng krudo sa pandaigdigang merkado.
Noong Martes, nagsara ang piso sa ₱61.675 kada dolyar, mas malakas ng 7.1 sentimo kumpara sa nakaraang araw. Gayunpaman, umabot ito sa ₱61.75 kada dolyar sa kalagitnaan ng kalakalan, ang pinakamahinang antas nito sa loob ng araw.
Ayon sa MUFG, mas sensitibo ang Pilipinas sa mga panlabas na krisis dahil sa kakulangan sa balanse ng kalakalan at pag-asa sa mga inaangkat na produkto, lalo na ang langis.
Kapag humina ang piso, mas maraming piso ang natatanggap ng mga pamilyang umaasa sa remittances mula sa abroad at mas nagiging kompetitibo ang mga exporter. Ngunit nagiging mas mahal naman ang mga imported na produkto at tumataas ang gastos sa pagbabayad ng mga utang na nakabase sa dolyar.
Samantala, sinabi ng Bangko Sentral ng Pilipinas (BSP) na maaari pa itong magtaas ng interest rates kung kinakailangan upang mapigilan ang pagtaas ng inflation. Inaasahan din ng MUFG na magpapatupad pa ang BSP ng karagdagang 75 basis points na rate hikes, na maaaring magdala sa policy rate sa 5.25 porsyento.
Sa kabila ng mga panganib, nakikita ng MUFG ang mga senyales ng mas malakas na paggastos ng pamahalaan, na maaaring makatulong sa paglago ng ekonomiya ng bansa. RNT/MND
