COTABATO CITY- Tuloy ang gaganaping bagong plebisito ngayong Sabado sa Special Geographic Area (SGA) ng Bangsamoro Autonomous Region in Muslim Mindanao (BARMM) sa kabila ng matinding init ng panahon na posibleng makaapekto sa mga botante.
Sa pahayag ni Mohd Asnin Pendatun, tagapagsalita ng BARMM, bagama’t walang nakitang malaking hamon ang rehiyon sa paparating na plebisito na lumikha ng walong bagong bayan mula sa 63 na nayon na dating kabilang sa lalawigan ng Cotabato, pinangangambahan nila ang dulot ng matinding init ng panahon para sa mga dadalo.
Aniya, ang heat index nitong mga nakaraang araw sa Cotabato City at Cotabato province ay pumalo sa 40 degrees Celsius.
Dagdag pa ni Pendatun, inaasahan nila ang 100 porsyentong turnout mula sa 89,594 na rehistradong botante ng SGA.
“Ang matinding init na dulot ng El Niño ay maaaring maging isang pangunahing kadahilanan kung maabot natin ang target o hindi,” ani Pendatun.
Gayundin, paniwala ni Cotabato provincial election supervisor Mula Luna-Bayao, maaaring makaapekto ang matinding init ng panahon sa bilang ng mga botante.
Kaugnay nito, nakipag-ugnayan na rin ang poll body sa mga awtoridad at paramedics para matiyak na komportable ang mga botante sa araw ng pagboto.
Umaasa naman ang BARMM sa mataas na turnout at pare-parehong naniniwala sa “Oo” na boto.
Sinabi pa ni Pendatun na ang pagpapatibay ng walong batas na lumilikha ng mga bagong bayan ay bilang paghahanda para sa unang parliamentaryong halalan sa 2025.
Kabilang sa mga magiging munisipalidad ay ang Phamuddin, Kadayangan, Nabalawag, Old Kaabakan, Kapalawan, Malidegao, Tiugnan at Ligwasan. Ang mga iminungkahing bayan na ito ay binubuo ng 63 na mga barangay na pinangungunahan ng mga Muslim mula sa mga bayan ng Carmen, Kabacan, Pikit, Midsayap, at Pigcawayan sa lalawigan ng Cotabato.
Sinabi ni Luna-Bayao na gagawing manual ang lahat mula sa pagboto, pagbibilang, at canvassing.
Ito ay gaganapin sa 67 voting centers na nagho-host ng 189 clustered precincts. Ang mga nayon na dating kabilang sa bayan ng Pikit ang may pinakamataas na bilang ng mga rehistradong botante na 39,642.
Naglaan ang regional government ng humigit-kumulang P80 milyon para sa pagsasagawa ng plebisito. Mary Anne Sapico
