MANILA, Philippines – Ibinasura ng Office of the Ombudsman ang mga reklamong plunder, graft at malversation na inihain laban kay Executive Secretary Ralph Recto at dating Philippine Health Insurance Corp. (PhilHealth) President at Chief Executive Officer Emmanuel Ledesma kaugnay ng paglilipat ng ₱60 bilyong hindi nagamit na pondo ng PhilHealth sa National Treasury.
Sa 40-pahinang consolidated resolution na may petsang Hunyo 2, sinabi ng Ombudsman na walang sapat na ebidensya upang maitaguyod ang mga kasong kriminal at administratibo laban sa mga respondent.
“Nilulutas ng Tanggapan na ibasura ang mga reklamong kriminal at administratibo laban sa mga respondent dahil sa kawalan ng prima facie evidence at kakulangan ng ebidensya,” ayon sa resolusyon.
Ang reklamo ay nag-ugat sa direktiba ni Recto noong siya pa ang Kalihim ng Department of Finance (DOF) na ilipat sa National Treasury ang ₱60 bilyong hindi nagamit na pondo ng PhilHealth alinsunod sa isang espesyal na probisyon ng 2024 General Appropriations Act (GAA).
Ayon sa Ombudsman, hindi napatunayan ang alegasyon ng plunder dahil naibalik na sa PhilHealth ang naturang ₱60 bilyon, kaya nawawala ang mahalagang elemento ng krimen na pagkakaroon ng ill-gotten wealth na hindi bababa sa ₱50 milyon.
“Ang pagbabalik ng ₱60 bilyon sa PhilHealth ay sumasalungat sa alegasyong ginamit ng mga respondent ang kanilang posisyon para sa personal na pagpapayaman,” ayon sa desisyon.
Hindi rin umano napatunayan ng mga nagreklamo na may manifest partiality, evident bad faith, o gross inexcusable negligence sina Recto at Ledesma, na kinakailangan upang magkaroon ng pananagutan sa ilalim ng Anti-Graft and Corrupt Practices Act.
Ayon sa mga state prosecutor, isinagawa lamang ng dalawang opisyal ang kanilang mga tungkulin bilang bahagi ng implementasyon ng Special Provision 1(d) ng 2024 budget law, na nagpapahintulot sa pagbabalik ng sobrang pondo ng mga government-owned and controlled corporations sa National Treasury para pondohan ang mga unprogrammed appropriations.
Kaugnay naman ng reklamong technical malversation, sinabi ng Ombudsman na bagama’t mali ang naging interpretasyon ng mga respondent sa katangian ng pondo, walang sapat na ebidensyang magpapatunay na may intensyon silang gumawa ng paglabag.
Binanggit din ng Ombudsman na ipinaalam mismo ni Recto sa Korte Suprema ang plano ng gobyerno na ibalik ang pondo sa PhilHealth, na nagpapakita umano ng kawalan ng masamang hangarin.
“Ang mga natatanging pangyayari sa kasong ito ay nagtutulak sa Tanggapan na ibasura ang kasong Technical Malversation dahil hindi napatunayan ng mga nagrereklamo ang intensyon ng mga respondent na gawin ang naturang paglabag,” ayon sa resolusyon.
Sinang-ayunan din ng Ombudsman ang mga opinyon nina Supreme Court Justice Jhosep Lopez at Justice Raul Villanueva, na nagsabing nabigo ang mga petitioner na patunayan ang mga alegasyon ng plunder at technical malversation laban kay Recto, at na ang pagpaparusa rito ay tila pagpaparusa lamang sa kanya dahil sa pagtupad sa kanyang tungkulin. RNT/JGC
