MANILA, Philippines- Ikinahihiya ni Senate President Francis “Chiz” Escudero ang pagkabigo ng Philippine National Police (PNP) at iba pang law enforcement agencies sa nabigong pag-aresto kay suspended Bamban, Tarlac Mayor Alice Guo.
“Oo, nakakahiya, kahiya-hiya para sa PNP na hindi magawa ito, lalo na na nandito pa naman daw sila sa bansa ayon sa Bureau of Immigration,” ayon kay Escudero sa ambush interview.
Sinabi ni Escudero na hindi lamang arrest order ang dapat ipatupad ng PNP laban ka Guo pero mayroon pang ibang krimen.
“‘Di ba maraming akusado na mas malala pa nga ang krimen, mas malalaki pa ‘yung mga kaso na hindi nila nahuhuli,” wika ng senador.
Sa kabila nito, tiniyak naman ni Escudero na hindi babawasan ang badyet ng PNP at National Bureau of Investigation.
“E di lalo nilang hindi makikita ‘yung iba. Again, hindi naman ito carrot and stick [na] paparusahan mo kapag may mali, kapag hindi naubos ang budget. Kailangan tingnan natin lahat ng circumstances sa paligid noon,” giit ni Escudero.
Mahigit dalawang linggo nang hindi naaaresto si Guo at kaanak nito.
Sa ngayon, tanging ang accountant ni Guo, si Nancy Gamo, ang awtorisadong kinatawan ng POGO firms sa Bamban, Tarlac at Porac, Pampanga, Dennis Cunanan, ang humarap sa Senate investigation.
Inalis na ang contempt charges laban kina Gamo at Cunanan ng Senate committee on women, children, family relations, and gender equality.
Iniimbestigahan ng Senado ang pagkakasangkot ni Guo sa illegal POGO hub na nilusob sa Bamban, Tarlac. Ernie Reyes
