MANILA, Philippines – Itinaas ng Philippine National Police (PNP) ang full alert status sa mga rehiyon ng Davao at Caraga matapos ang 7.4 magnitude na lindol na tumama sa karagatan ng Davao Oriental nitong Biyernes ng umaga.
Ayon sa Phivolcs, naganap ang lindol bandang 9:43 a.m., 43 kilometro hilagang-silangan ng Manay, Davao Oriental.
“All affected areas, the two regions (Davao and Caraga), are on full alert,” pahayag ni PNP public information chief Brig. Gen. Randulf Tuaño sa press briefing sa Camp Crame.
Batay sa paunang ulat, nagkaroon ng pinsala ang Panabo City Police Station at Talaingod Municipal Police Station, habang pansamantalang isinara sa mga motorista ang Magsaysay Bridge sa Butuan City dahil sa bitak.
Sinabi ni Tuaño na nagpapatuloy pa ang assessment ng lawak ng pinsala at deployment ng mga tauhan. Ayon pa sa kanya, inatasan ni PNP Acting Chief Lt. Gen. Jose Melencio Nartatez Jr. ang mga apektadong rehiyon na higpitan ang seguridad at tumulong sa mga operasyon ng paglikas.
“Our personnel are ready to provide security at evacuation centers. As of now, some centers have been established but no evacuees are yet present,” ani Tuaño. Santi Celario
