MANILA, Philippines – Nakahinga nang maluwag ang pamunuan ng Philippine National Police (PNP) matapos hindi mapasama ang ahensya sa listahan ng mga government agency na may pinakamaraming reklamo, batay sa monitoring at audit ng Anti-Red Tape Authority (ARTA) para sa unang quarter ng taon.
Ayon kay PNP chief Gen. Jose Melencio C. Nartatez Jr., resulta ito ng kanilang mas pinaigting na internal cleansing program.
“Our absence from the ARTA list is not a result of chance but a product of a deliberate and aggressive internal cleansing program. We have shifted to a proactive organization,” ani Nartatez.
Sinabi niyang malaking tulong dito ang Enhanced Managing Police Operations (EMPO) at ang paglipat ng PNP mula sa reactive patungo sa proactive policing.
Binanggit din niya ang resulta ng OCTA Research survey kung saan nakakuha ang PNP ng 63% public trust rating at 61% satisfaction rating mula sa publiko.
“It shows the Filipino people are feeling the effects of our reforms. We are building a foundation,” dagdag niya.
Upang mapanatili ito, inatasan ni Nartatez ang lahat ng police units at commanders na mahigpit sundin ang Citizen’s Charter para maiwasan ang mabagal na proseso sa serbisyo.
Iginiit din niyang tuloy-tuloy ang kampanya laban sa mga “ninja cops” at scalawags na sumisira sa imahe ng PNP.
“My marching order to every commander is simple: do not let your guard down. We must sustain this momentum. Our goal is to be the gold standard of public service,” ani Nartatez. RNT/MND
