MANILA, Philippines – Sinabi ng Philippine National Police nitong Miyerkules na walang espesyal na pagtrato kay Senador Ronald Dela Rosa sa anumang operasyon kaugnay ng pagpapatupad ng warrant of arrest mula sa International Criminal Court.
Ayon kay PNP chief Jose Melencio Nartatez Jr., lahat ng aksyon ng pulisya ay susunod lamang sa batas kahit dating hepe ng PNP si Dela Rosa.
“The Philippine National Police operates strictly on legal frameworks and our sworn oath to serve and protect, meaning no individual is above the law regardless of rank or title,” ani Nartatez.
Dagdag niya, inatasan na ang mga pulis na ipatupad ang lahat ng legal na utos nang propesyonal at walang kinikilingan.
“While our ranks maintain an institutional respect for Senator Bato Dela Rosa as a former PNP chief, we assure the public that there will be no special treatment, and our personnel will execute all lawful directives with absolute professionalism, impartiality, and transparency,” dagdag pa niya.
Nahaharap si Dela Rosa sa arrest warrant ng ICC kaugnay ng alegasyon sa war on drugs noong nakaraang administrasyon.
Sinabi rin ni Nartatez na inutusan ang mga commander na sundin ang standard operating procedures at pigilan ang paglabas ng anumang impormasyon na maaaring makaapekto sa operasyon.
Nakikipag-ugnayan na rin ang PNP sa iba pang ahensya ng gobyerno para sa maayos na pagpapatupad ng anumang legal na proseso laban sa senador.
Nanawagan din si Nartatez sa mga pulis na manatiling disiplinado sa gitna ng matinding atensyon ng publiko sa kaso.
“We expect all officers to uphold standard operating procedures without fear or favor, and we explicitly appeal to Senator Dela Rosa’s enduring sense of duty as a lifelong law enforcer to cooperate fully with the legal process,” aniya. RNT/MND
