MANILA, Philippines – Isinailalim sa restrictive custody ang isang police major ng Philippine National Police (PNP) matapos masangkot sa alegasyon ng pagbibigay-proteksyon sa ilegal na online cockfighting o “e-sabong” sa Negros Island, ayon sa pahayag ng PNP nitong Martes.
Ayon sa PNP, inalis na rin sa puwesto ang naturang opisyal habang nagpapatuloy ang pinalalawak na imbestigasyon sa sinasabing illegal gambling network. Hindi muna isiniwalat ang pagkakakilanlan ng nasabing pulis.
“The officer has since been relieved from his post and placed under restrictive custody as part of an expanding probe into the alleged gambling network,” ayon sa PNP.
Sinabi ni PNP Chief Police General Jose Melencio Nartatez Jr. na tinanggal din sa tungkulin ang opisyal at iniutos ang mas pinaigting na intelligence monitoring at case buildup laban sa mga pulis na hinihinalang sangkot sa ilegal na gawain.
“This kind of police officer symbolizes termites that threaten to destroy what we all built for the PNP. We will not allow that to happen by exhausting all necessary measures to identify them and hold them accountable,” pahayag ni Nartatez.
Inatasan din ang Criminal Investigation and Detection Group (CIDG) at Integrity Monitoring and Enforcement Group (IMEG) na palakasin ang surveillance at information gathering laban sa mga tiwaling tauhan.
Nagpaalala rin ang hepe ng PNP sa mga commanders sa mahigpit na pagbabantay sa kanilang mga tauhan sa ilalim ng command responsibility, at binalaan na maaari silang managot kung mapapatunayang sangkot ang kanilang nasasakupan sa ilegal na aktibidad.
Tiniyak din ni Nartatez na personal niyang babantayan ang kaso upang matiyak ang pagsasampa ng kaukulang kriminal at administratibong kaso habang sumusunod sa due process.
“There are only a few of them in the PNP. Let us all work together to identify them and remove them from our organization to protect our badge and what we established so far in winning the hearts and minds of our kababayan,” aniya. Santi Celario
