MANILA, Philippines – Palalakasin ng Philippine National Police (PNP) ang koordinasyon sa Department of Social Welfare and Development (DSWD) para maiwasan ang posibleng overcrowding sa mga youth shelter dahil sa pinaigting na pagpapatupad ng curfew.
“Our goal is to protect the youth, not overwhelm the system. By working closely with DSWD, we ensure that rescued minors receive proper care without straining our shelters,” saad sa pahayag ni PNP chief Police General Jose Melencio Nartatez Jr. kaugnay sa posibleng pagsisiksikan sa lokal na mga pasilidad ng Bahay Pag-asa kung daan-daang menor de edad ang mahuhuli gabi-gabi dahil sa paglabag sa curfew
“The curfew is a preemptive shield. It reduces the window of opportunity for syndicates to exploit minors and keeps our youth away from environments that breed criminality,”
Ito ay kasunod ng pinaigting na pagpapatupad ng curfew hours para sa mga menor de edad sa Metro Manila sa ilalim ng initial launch ng Safer Cities Initiative ng pamahalaan.
Kamakailan ay hinimok ng Children’s Legal Rights and Development Center ang Department of Interior and Local Government (DILG) na muling suriin ang polisiya dahil maaari itong magdulot ng arbitrary arrests at pang-aabuso sa children at risk.
Tinukoy ng grupo ang mga nagdaang operasyon kabilang ang anti-loitering campaign noong 2018 kung saan nagresulta sa overcrowded shelters at mga pang-aabuso sa menor de edad ang naturang operasyon.
Sa kabila ng mga pangamba, siniguro ng PNP na babalansehin nito ang kaligtasan ng publiko at pagprotekta sa mga bata.
Noong Lunes ay inanunsyo ng DILG ang mahigpit na implementasyon sa pagbabawal ng pag-inom ng alak sa pampublikong lugar at mga kalsada, gambling, paglabas nang nakahubad, at curfew sa mga menor de edad.
Mahigit 48,000 violator ang nahuli sa unang tatlong araw ng operasyon sa Metro Manila. RNT/JGC
