Pre-trial conference sa VP Sara impeachment trial, nagsimula na

MANILA, Philippines – Pormal nang nagsimula nitong Huwebes, Hunyo 18, ang pre-trial conference para sa impeachment trial ni Vice President Sara Duterte sa Senado.

Dumalo sa pagpupulong ang mga miyembro ng defense team ni Duterte at House prosecution panel, maliban kay Dinagat Islands Representative Kaka Bag-Ao na hindi nakadalo.

“It’s a normal process naman so it’s really stipulation of facts and simplification of issues,” ayon kay abogado Michael Poa, legal counsel ni Duterte.

Ang pre-trial conference ang unang pormal na pagpupulong ng depensa at prosekusyon bago magtipon ang Senate impeachment court sa Hulyo 6.

Nahaharap si Duterte sa mga reklamong culpable violation of the Constitution, graft and corruption, betrayal of public trust, bribery, at iba pang matataas na krimen. Pangalawang beses siyang inimpeach ng House of Representatives noong Mayo.

Noong Mayo 18 ay nagtipon ang Senado bilang impeachment court, habang naghain naman ang kampo ni Duterte ng kanilang sagot sa Articles of Impeachment noong Hunyo 1 at hiniling na ibasura ang kaso laban sa kanya.

Dumating ang pre-trial conference isang araw matapos maresolba ang tunggalian sa liderato ng Senado sa pagkakahalal kay Senator Sherwin Gatchalian bilang bagong Senate president. Inamin ni Senator Alan Peter Cayetano ang kanyang pagkatalo matapos lumipat sa kampo ni Gatchalian ang dalawa niyang kaalyado.

Ayon naman kay Senator Panfilo Lacson, nagkaroon na ng paunang kasunduan ang bagong majority bloc sa Senado na italaga si Senator Francis “Chiz” Escudero bilang presiding officer ng Senate impeachment court. RNT