MANILA, Philippines – Ayon kay House Committee on Justice Chairperson Gerville Luistro, ang anunsyo ni Vice President Sara Duterte ng kanyang presidential bid ay “hindi material” sa kasalukuyang impeachment proceedings laban sa kanya.
Aniya, dapat panatilihin ng mga miyembro ng House ang kanilang independensya at gampanan ang kanilang constitutional duty, anuman ang political affiliations.
“Dapat hindi ito maging material. Ito ay Constitutional duty… Hindi ito tanong kung pro-admin ba kami o pro-Duterte,” sabi ni Luistro. “Ang aming pananagutan ay sa soberanong Pilipino, hindi sa Pangulo o Vice Presidente.”
Sa kabila ng apat na pending impeachment complaints laban kay Duterte, sinabi ni Luistro na wala pang garantiya na awtomatikong maaprubahan ang mga ito ng komite. Susuriin ng House Committee on Justice kung sapat ang form at substance ng mga complaints at kung may probable cause para irekomenda ang impeachment.
Karaniwang batayan sa mga reklamo ang umano’y maling paggamit ng confidential funds, kabilang ang sinumpaang testimonya ng umano’y bagman na si Ramil Madriaga. Iginiit ni Duterte na hindi siya nagkamali sa pondo.
Samantala, pinuna ni Fr. Flavie Villanueva, na tumulong sa pamilya ng biktima ng nakaraang drug war, ang presidential bid ni Duterte at nanawagan na harapin niya ang alegasyon ng maling paggamit ng pondo. Ani Villanueva: “Kung hindi, she has no right to declare. While she has the right to aspire, but for the betterment of the Filipino people, we deserve someone better.”
Sa ilalim ng Konstitusyon, ang impeachment ay humahantong sa Senate trial. Kung guilty, maaring maalis si Duterte sa politika at mapigilan ang kanyang presidential run sa 2028. RNT/MND
