MANILA, Philippines – Sinabi ng Department of Transportation (DOTr) na plano nitong isapribado rin ang operasyon ng iba pang Paliparan sa Pilipinas upang mapabuti ang mga serbisyo nito.
Sa 2024 Aviation Summit, sinabi ni DOTr Undersecretary for Aviation and Airports Roberto Lim na sa susunod na linggo ay nakatakdang pumirma ng concession agreement sa Aboitiz InfraCapital (AIC) para sa operasyon at maintenance ng Laguindingan Airport sa Misamis Oriental.
Nagkakahalaga ang proyekto ng P12.75 bilyon para sa 30-year concession period.
Samantala, ang deadline naman para sa “Swiss challenge” sa unsolicited bid sa operasyon ng Bohol-Panglao airport ay itinakda sa Nobyembre.
Nakuha rin ng Aboitiz ang “original proponent status” ng Bohol airport.
“We are excited to take on revitalizing Laguindingan Airport and collaborating with stakeholders to create a world-class facility that serves the travelers and the community alike,” saad sa pahayag ni Cosette Canilao, AIC President at Chief Executive Officer.
Marami pang mga airport projects ang nakalinya para sa posibleng public private partnership deal.
Kabilang dito ang Iloilo at Puerto Princesa sa bid ng Prime Ventures ng mga Villar, at Kalibo sa bid ng Mega7.
“We’re trying to decongest CAAP with the burden of operating a facility. We want CAAP to unburden itself with the responsibility of operating airports,” ani Lim.
Dagdag niya, nagsasagawa na rin ng pag-aaral kasama ang Asian Development Bank sa posibilidad ng bundle sa mga paliparan sa isang package.
“Make sure it is economically viable and therefore attractive for the private sector to participate in undertaking a PPP. But there is also a developmental aspect,” dagdag pa niya.
Mayroong 90 paliparan sa Pilipinas kabilang ang mga maliliit na airport.
Lima lamang sa mga ito ang pinatatakbo ng pribadong kompanya, ang Ninoy Aquino International Airport, Mactan-Cebu International Airport, Clark International Airport, Caticlan Airport, at Laguindingan Airport. RNT/JGC
