MANILA, Philippines — Hindi mamadaliin ng House prosecution panel si dating Department of Education (DepEd) special disbursing officer (SDO) Edward Fajarda na tumestigo sa impeachment trial ni Vice President Sara Duterte.
Na-reset ang kanyang testimonya matapos siyang ma-stroke sa ibabang bahagi ng likod ng kanyang utak, ayon sa kanyang doktor.
“Sa tingin ko kailangan niya munang magpahinga. Wala namang may gusto na magkaroon ng sakit sa kalusugan… Mas maganda sana kung nasunod yung roster ng witnesses pero at this point kung mayroon siyang nararamdaman baka wala rin siyang maibigay at mahirapan siya kahit nga mag-attend lang,” ani House Deputy Speaker at prosecution counsel Paolo Ortega V.
Sumang-ayon si Manila 6th District Rep. Bienvenido Abante at sinabing handang maghintay ang prosecution hanggang sa kaya nang humarap ni Fajarda sa impeachment court.
“We’re sorry to hear on what happened to SDO Fajarda… I believe the prosecution team would be willing to wait until he is well enough to face the impeachment court,” ani Abante.
Dagdag niya, “Hindi naman namin talaga pipilitin o mamadaliin yan. Kinakailangan talaga siya magpagaling muna.”
Unang nakatakdang tumestigo si Fajarda noong Agosto 25. Bilang SDO ng DepEd noong kalihim pa si Duterte, siya ang inatasang mag-disburse at mag-liquidate ng P112.5 milyon na confidential funds mula una hanggang ikatlong quarter ng 2023.
Ang kanyang testimonya ay bahagi ng kaso tungkol sa umano’y maling paggamit ng confidential funds ni Duterte sa DepEd. RNT/MDS
