MANILA, Philippines – Nilinaw ng House prosecution panel na wala silang balak na baguhin ang two-thirds vote na kailangan upang mapatalsik sa puwesto si Vice President Sara Duterte.
Sa isang press conference, sinabi ni House Prosecution legal spokesperson Atty. Jay Tolosa na nakatutok ang prosekusyon sa pagbuo ng isang matibay na kaso para makuha ang kinakailangang 16 na boto sa Senado.
Alinsunod sa Saligang Batas, kinakailangan ang pagsang-ayon ng two-thirds ng lahat ng miyembro ng Senado para sa isang guilty verdict.
Dahil mayroong 24 na senador, dapat makakuha ng hindi bababa sa 16 na boto para maging ganap ang hatol laban kay Duterte.
“We’re not giving the impression or the message na gusto na naming palitan nila ang two-thirds vote. We’ve never said that, and we’re not saying that now,” pahayag ni Tolosa Jr.
“And if it’s two-thirds, we respect it. And again, our job is to present evidence to secure that vote,” dagdag pa nito.
Sinabi ni Tolosa na simula pa lamang ay nirerespeto ng prosekusyon ang 2/3 vote, alinsunod sa naging kautusan ni Presiding Officer Chiz Escudero.
“Our position on this has been consistent from the start. Mula nung ginawa ‘yang desisyon na ‘yan ng presiding officer, we always said we will respect it. And we always said, anyway, that has never been our focus. We don’t engage in vote counting from the start,” pagtatapos ni Tolosa. Gail Mendoza
