Proyekto ng flood control sa Candaba, Pampanga pinaiimbestigahan

MANILA, Philippines – Humiling ang ilang residente ng Candaba, Pampanga sa National Bureau of Investigation (NBI) na imbestigahan ang mga umano’y iregularidad sa flood control projects at paggamit ng pondo ng pamahalaan, na sangkot ang mga kumpanya na iniuugnay kay Candaba Mayor Rene Maglanque.

Nitong Biyernes, Setyembre 11 ay dumating si Atty. Faye Singson at Atty. Joey dela Cruz, counsel para sa 14 residente na nagsilbing complainant kasama si dating Candaba Mayor Jerry Pelayo sa opisina ng NBI Organized and Transnational Crimes Division para maghain ng reklamo.

Mayroon diumanong irregulariad sa paggamit ng pondo ng gobyerno sa flood control projects.

Direktang isinasangkot ang Sto. Cristo Construction & Trading at ang Globalcrete Builders, Inc., na nakakopo umano ng P1.4 bilyon sa kontrata sa mga taong 2022 hanggang 2025.

Pagmamay-ari umano ng mga anak ng mayor ng Candaba, dating DPWH Secretary at dating DPWH Director ang mga kontratista sa flood control projects.

Habang isinusulat ang balitang ito, sinisikap ng Remate Online na makuha ang panig ng mga isinasangkot sa kontrata. Dave Medina