MANILA, Philippines – Ipipresenta ng House prosecution team ang mga opisyal ng Philippine Statistics Authority (PSA) para patunayan ang mga alegasyon na nag-disburse ang opisina ni Vice President Sara Duterte ng confidential funds sa “fictitious individuals,” sinabi ni prosecutor Terry Ridon ng Bicol Saro party-list.
“The PSA [officials] are included in the witnesses for the allegation on misused confidential funds because they are the ones who conducted the study, and this was also revealed during the House inquiry… the study, which showed that the names [on the acknowledgment receipts] stating Mary Grace Piattos, Milky Secuya, among others, ay hindi ipinanganak, hindi kinasal, at hindi namatay sa Pilipinas kasi wala sila sa PSA records,” ani Ridon sa isang press conference.
“We will be able to show that these are fake, fictitious individuals. Ibig sabihin, talaga po na may nangyaring kababalaghan at maling paggamit dito po sa pondo ng bayan,” dagdag pa niya.
Kabilang sa mga kakaibang pangalan na natukoy bilang recipients ng confidential fund ay sina:
₱500,000 — Feonna Villegas
₱500,000 — Clarisse Hontiveros
₱350,000 — Honeylet Camille Sy
₱250,000 — Heart Santiago
₱200,000 — Jay Kamote
₱180,000 — Salah Casim
₱150,000 — Ralph Josh Bacon
₱150,000 — Jose Diokno Jr.
₱140,000 — Pia Patios-Lim
₱130,000 — Beverly Claire Pampano
₱120,000 — Denise Tanya Escudero
₱100,000 — Xiaomi Ocho
₱50,000 — Miggy Mango
₱50,000 — Matthew N. Keso
₱50,000 — Kristine Applegate
₱50,000 — Anne Ongpauco
₱50,000 — Beth Revilla
Nauna nang ipinresenta ng prosekusyon ang Notice of Disallowance (ND) na inisyu ng Commission on Audit (COA), na pumupuna sa disbursement ng OVP ng confidential fund, bilang ebidensya.
Inilalabas ang ND kapag ang expenditure ay “either irregular, unnecessary, excessive, extravagant, or unconscionable” at inaatasan ang ahensya na ibalik ang halaga sa pamahalaan.
Nakapag-isyu na ang COA ng pinal na ND sa P73 milyong disbursement ng OVP ng confidential fund para sa taong 2022.
Dagdag pa, nag-isyu rin ang COA ng ND sa P375 milyong disbursement naman ng OVP para sa 2023 bagamat ito ay iniapela pa sa COA.
Ang dalawang ND ay maaaring iapela sa Korte Suprema ngunit sinabi ng prosecution witness at abogado na si Roderick Wamil ng COA na ang ND ng COA ay enforceable hanggat hindi nag-iisyu ng Temporary Restraining Order ang Korte Suprema laban sa implementasyon nito.
Noong Pebrero, sinabi ng kampo ni Duterte na handa nitong ipaliwanag ang paggamit ng mga alyas sa confidential funds kabilang ang sumikat na pangalan na si “Mary Grace Piattos.”
“Specifically the ‘Mary Grace Piattos,’ we are ready to respond to that and explain bakit may mga ganyan,” ani Michael Poa, spokesperson ng defense team ni Duterte.
“She will address those issues in the appropriate time at kung ang circumstances bakit may ‘Mary Grace Piattos’ and things like that, and that has been something we have been preparing for last year pa,” dagdag pa. RNT/JGC
