MANILA, Philippines – Nagdeklara ng state of calamity ang bayan ng Puerto Galera sa Occidental Mindoro dahil sa matinding kakulangan ng suplay ng tubig na dulot ng matagal na tagtuyot.
Inaprubahan noong Hunyo 15 ang Resolution No. 005-2026 na inihain ng Municipal Disaster Risk Reduction and Management Council (MDRRMC) sa ika-23 regular na sesyon ng Sangguniang Bayan na pinangunahan ni Vice Mayor Rocky D. Ilagan.
Ayon sa mga lokal na opisyal, layunin ng deklarasyon na mapabilis ang pagpapalabas ng pondo para sa mga emergency response at mabigyan ng kaukulang tulong ang mga apektadong konsyumer ng tubig, kabilang ang pagpapaluwag sa ilang kaugnay na bayarin at parusa.
Sa kabila nito, tiniyak ng White Beach Business Owners Association na nananatiling normal ang operasyon ng mga resort, hotel at restaurant sa pangunahing tourist destination ng bayan.
“Most accommodations and establishments in the area maintain their own independent water supply systems, ensuring that guest services and stays are not affected. All tourism-related activities continue as scheduled under normal operations,” ayon sa grupo.
Dagdag nito, patuloy na tinatanggap ang mga turista at hindi naaantala ang mga serbisyo ng mga accredited establishment sa lugar.
“We warmly invite tourists to continue visiting Puerto Galera and enjoy its natural beauty, beaches, and hospitality with peace of mind. There is no need for worry regarding water supply, as guest comfort remains a priority across the tourism community,” pahayag ng samahan. Mary Anne Sapico
