NAGUILIAN, Isabela – Himas rehas ang isang pulis, professor at lima pang katao na naaktuhang naglalaro ng iligal na sugal sa Brgy. Quirino, Naguilian, Isabela.
Sa direktiba ni PCol. Lee Allen B. Bauding, Provincial Director ng Isabela Police Provincial Office o IPPO sa pinaigting na kampanya sa illegal gambling ay nadakip ng Naguilian Police Station, PIU-IPPO, at IMEG-LFU2 ang anti-illegal gambling operation kung saan naaktuhan ang mga naglalaro ng Paik que o Pekyu.
Sa nasabing operasyon, nasakote ang pitong indibidwal habang ang iba pang tumataya ay nagawang makatakas.
Sa pagsisiyasat ng pulisya sa lugar, nakita pa sa paanan ng pulis ang isang coin purse na may lamang tatlong (3) plastic sachet na naglalaman ng puting crystalline substance na hinihinalang Shabu.
Kaagad isinagawa ang imbentaryo at pagmamarka sa lugar saka dinala ang mga ebidensya at mga suspek sa himpilan ng pulisya para sa kaukulang dokumentasyon at tamang disposisyon. Rey Velasco
