MANILA, Philippines — Nagsagawa ng protesta ang mga miyembro ng transport group na PISTON sa Land Transportation Franchising and Regulatory Board (LTFRB) Central Office sa Quezon City nitong Lunes ng umaga.
Inorganisa ang protesta bilang tugon sa pagsuspinde kamakailan ng Public Transport Modernization Program (PTMP) sa Bacolod City.
Pinangunahan ni PISTON National President Mody Floranda ang protesta, na nagpahayag ng suporta para sa isang resolusyon na ipinasa ng Bacolod City Council at isang desisyon na pinangunahan ng LTFRB Regional Director na nagpapahintulot sa pag-renew ng mga prangkisa ng transportasyon.
“Sinusuportahan natin ang resolusyon ng sangguniang panlalawigan ng Bacolod at ang resolusyon din na inilabas ng Region VI director ng LTFRB na kung saan ay pinapayagan na tayo ay makapag-renew ng ating mga prangkisa at pagrehistro ng ating mga sasakyan,” ani Floranda.
“Dapat ito ay kilala ng central office ng LTFRB at DOTr at syempre ni Bong Bong Marcos na dahil ang naka taya dito ay kabuhayan hindi lamang ng mga operator kundi mga drayber at syempre ng ating mga commuters,” dagdag pa niya kasabay ng panawagan sa LTFRB Central Office at Department of Transportation (DOTr) na kilalanin ang mga resolusyong ito.
Binigyang-diin niya na ang mga lokal na stakeholder ay dapat na makilahok sa mga pagpupulong sa mga direktor ng LTFRB, dahil sa direktang epekto ng mga ito mula sa pagsususpinde ng PTMP.
“Kaya’t itong araw na ito ay meron nang magaganap na pagpupulong lahat ng director ng LTFRB sa buong bansa kaya’t narito rin tayo sa harapan ng LTFRB para igiit na dapat tayo ay maging bahagi ng paguusap ng mga direktor sapagkat tayo ang isa. sa naapektuhan nung kanilang programa,” aniya pa.
Lumahok din sa protesta si Mar Valbuena, tagapangulo ng MANIBELA at binigyang-diin niya ang kahalagahan ng resolusyon ng Bacolod para sa pag-secure ng prangkisa para sa mga operator at driver.
“Mahalagang mahalaga sa atin ito katulad ng ibang LGU at marami nang LGUs dahil ang naglabas ng mga resolusyon na sinusuportahan ang Senate resolution… na tama naman kasi ang argumento natin na dapat talagang makapagpatuloy pa tayo sa ating hanapbuhay,” ani Valbuena.
Pinuna niya ang PTMP, na nangangatwiran na hindi patas ang epekto nito sa kanilang kakayahang kumita ng kabuhayan at lumalabag sa mga legal na karapatan.
“Hindi dahilan na hindi nakapag-consolidate na hindi kami nakipag kooperatiba ay mawawalan na kami ng hanap buhay. Labag ito sa batas, labag ito sa konstitusyon, [at] labag ito sa karapatan natin na makapaghanap buhay,” ani Valbuena.
“Tayo ay nakikiusap na igalang at irespeto din itong Senate resolution at mga resolusyon ng mga LGU na nagpahayag ng suporta. Marami po hindi lamang ang Bacolod [at] Iloilo. Marami na po ang nagpahayag ng suporta sa Central Luzon, ang Region IV A. Sana maaprubahan ito at mapakinggan ng ating LTFRB ng DOTr lalong lalo na ng ating pangulo.”
Inihayag din ni Valbuena ang posibilidad na mag-organisa ng isa pang welga sa transportasyon bago matapos ang buwan. RNT
