LUNGSOD NG LUCENA – Nakatanggap ng malaking suporta si Senador Ramon “Bong” Revilla Jr. para sa kanyang muling pagtakbo sa Senado sa 2025 matapos siyang opisyal na iendorso ng mga lokal na lider ng lalawigan ng Quezon, sa pangunguna ni Gobernadora Angelina “Helen” Tan, bilang kanilang “Number 1” na kandidato sa pagkasenador.
Ginawa ang pormal na pag-eendorso sa pagbisita ni Revilla sa lalawigan kasabay ng Alyansa Para sa Bagong Pilipinas rally, kung saan pinuri ni Gobernadora Tan ang matagal nang pagtutok ni Revilla sa mga batas na aniya ay “direktang nakakatulong sa aming mga kababayan.”
“Palaging isinusulong ni Senador Revilla ang mga batas na talagang nakikinabang ang aming mga mamamayan. Ang kanyang dedikasyon sa pagpapabuti ng buhay ng mga Pilipino ay tugma sa hangarin ng aming lalawigan tungo sa kaunlaran,” ani Tan.
Ang lalawigan ng Quezon, na may higit 1.5 milyong rehistradong botante, ay mahalagang bahagi ng rehiyong CALABARZON na bumubuo ng halos 9.8 milyong botante—isa sa mga pinaka-makapangyarihang rehiyon pagdating sa halalan.
Lubos ang pasasalamat ni Revilla sa mainit na pagtanggap sa kanya ng mga taga-Quezon:
“Maraming salamat sa inyo. Napakainit ng pagsalubong ninyo sa akin. Sa tiwala at pagmamahal pa lang na pinapakita niyo, pakiramdam ko panalo na ako,” pahayag ng senador.
Bilang bahagi ng administration-aligned Alyansa Para sa Bagong Pilipinas senatorial slate, tangan ni Revilla ang malalim na ugnayan sa rehiyon at malawak na karanasan sa paggawa ng batas, dahilan upang maging matibay siyang kandidato sa halalan.
Kabilang sa kanyang mga pangunahing batas ang “Kabalikat sa Pagtuturo Act” na nagbibigay-suporta sa mga guro, at ang “Expanded Centenarians Act” na naglalayong palakasin ang benepisyo ng mga senior citizens—patunay ng kanyang pagtutok sa edukasyon at kapakanan ng mga nakatatanda.
Patuloy ding lumalawak ang suporta kay Revilla mula sa iba’t ibang bahagi ng CALABARZON gaya ng Cavite, Laguna, Batangas, at Rizal, na higit pang nagpapatibay sa kanyang posisyon para sa halalang midterm sa Mayo 12, 2025. RNT
