Ramadan, ipinagdiwang na ng mga kapatid na Muslim

MANILA, Philippines – Nagsimula na ang gawain ng mga kapatid na Muslim sa Golden Mosque sa Quiapo, Maynila bilang bahagi ng pagsisimula ng pagdiriwang ng Ramadan.

Bandang alas-7 kagabi ay nagsimulang dumagsa ang mga nagsamba sa mosque bilang bahagi ng banal na buwan ng Ramadan.

Ang Ramadan ang pinakabanal na buwan para sa mga Muslim kung saan isinasagawa ang pag-aayuno mula madaling araw hanggang paglubog ng araw.

Kasabay din nito ang taimtim nilang pagdarasal at pagninilay, kung saan ang pag-aayuno ng mga Muslim ay hindi lamang pag-iwas sa pagkain at inumin.

Kasama rin sa kanilang pagninilay ang pag-iwas sa masasamang gawain upang linisin ang isipan at puso at upang patibayin ang kanilang pananampalataya.

Matatapos ang Ramadan sa pagdiriwang ng Eid’l Fitr kung saan magsasalo-salo ang bawat pamilyang Muslim, isang masayang pagdiriwang matapos ang isang buwang pag-aayuno.

Ito ay kadalasang isinasagawa sa Rizal Park kung saan maagang nagtitipon-tipon ang mga Muslim upang magdasal bago ang masayang pagsasalo-salo.

— Jocelyn Tabangcura-Domenden