MANILA, Philippines- Kinondena ng Office of the Presidential Adviser on Peace, Reconciliation and Unity (OPAPRU) ang pagkalat ng disinformation hinggil sa umano’y recruitment ng Moro National Liberation Front (MNLF) members sa Armed Forces of the Philippines (AFP).
Sinabi ni Presidential Adviser on Peace, Reconciliation and Unity Secretary Carlito Galvez Jr. nitong Linggo na inihayag ni Sharief Edjal Alimuddin, sinasabing “Governor General” ng MNLF, ang disinformation sa pag-recruit sa dating MNLF sa militar.
“The OPAPRU vehemently denies the spread of false information, which causes anxiety and fear among the people of Zamboanga City and, most of all, is detrimental to the 1996 Final Peace Agreement, the historic peace deal signed by the [government] and MNLF,” wika ni Galvez.
Inihayag din umano ni Alimuddin sa isang press conference sa Cabatangan, Zamboanga City na nire-recruit ang dating MNLF members sa AFP.
Nilinaw ni Galvez na walang umiiral na special recruitment process o reintegration para sa MNLF members na nais pumasok sa Philippine National Police (PNP) at sa AFP.
“If they want to join the PNP or AFP, they all have to undergo the regular recruitment process based on well-established criteria and qualifications,” pahayag ng opisyal.
Sinabi ng OPAPRU na nakipag-ugnayan na ito sa MNLF, sa ilalim ng liderato ni chair Nur Misuari, upang linawin ang isyu.
Naglabas din ng pahayag ang MNLF na nagdedeklarang hindi nito awtorisado si Alimuddin na mag-organisa ng ganitong uri ng pagtitipon. Dumistansya ito sa mga indibidwal na gumagawa ng mga bagay sa labas ng chain of command nito. RNT/SA
