MANILA, Philippines – Muling nakapagtala ng red tide sa coastal waters ng Bolinao at Anda sa Pangasinan, anim na araw matapos ideklarang ligtas ang mga lugar mula sa naturang toxin, ayon sa Bureau of Fisheries and Aquatic Resources Region I (BFAR-I).
Naglabas ng red tide advisory ang BFAR-I noong Miyerkules, na nagbabala sa publiko laban sa pangunguha, pagbebenta, at pagkain ng shellfish at alamang mula sa mga nasabing lugar dahil sa panganib ng paralytic shellfish poisoning.
“Based on the latest laboratory results of BFAR-I, shellfish samples collected from the coastal waters of the two towns have once again tested positive for red tide toxin. Fish, squid, crab, and shrimp remain safe to eat, provided they are fresh, properly cleaned (with internal organs removed), and thoroughly washed before cooking,” ayon sa advisory.
Unang nagpositibo sa red tide ang coastal waters ng Bolinao at Anda noong Enero 16 at idineklarang toxin-free noong Pebrero 19. Gayunman, kinumpirma ng patuloy na monitoring ang muling paglitaw ng harmful algal bloom (HAB) na sanhi ng red tide.
Ayon sa BFAR, ang HAB ay naglalabas ng toxins na mapanganib sa marine life at sa kalusugan ng tao at maaaring magdulot ng paralytic shellfish poisoning. Mary Anne Sapico
